JOU Kulturjournalistihkka
- Oahpahusgiella: Davvisámegiella
- Oahpahusbáiki: Sámi allaskuvllas
- 5 oahppočuoggá
- Vuosttáš deaivvadeapmi 20.-25.4.2017
Studeanttat ohppet kulturjournalistihka iešguđet šáŋŋeriid mas kultuvra- ja dáiddakritihkka lea deháleamos oassi. Dasa lassin sii oahpásnuvvet sámi kulturorganisašuvnnaide ja ohppet geavahit kultureallima vuođđun ođđasiid ráhkedeames.
Studeanttat oahpásmuvvet iešguđetge dáiddašlájaide ja besset iežas beroštumiid mielde válljet árvvoštallet muhtin daid čuovvovaš dáiddašlájain: dáiddaduodji, govvadáidda, installašuvnnat, girjjálašvuohta, musihkka, teáhter ja filbma.
Studeanttat geain lea teknihkalaš gelbbolašvuohta, sáhttet ráhkadit árvvoštallamiid TV-, rádio- dahje neahttamediaide. Eará studeanttat čovdet geatnegahtton bargguid dainna lágiin ahte buktet čálalaš árvvoštallamiid oktan govaiguin.
Ollislaš lohkanbadjeplána almmuhuvvo fargga, namuhuvvon deaivvadandáhtonat sáhttet rievdat.
Sisabeassangáibádusat
Sámi allaskuvlla vuođđooahpuid oppalaš sisaváldingáibádusat leat oppalaš lohkangelbbolašvuohta dahje reálagelbbolašvuohta ja sámegiella. Sámegiela gáibádusa sáhttá deavdit čuovvovaš vugiid mielde:
- Norgga joatkkaskuvllas sámegiella 1. dahje 2. giellan
- Suoma logahagas eatnigielladutkkus dahje guhkes amasgielladutkkus
- Ruoŧa bealde gymnasas eatnigiellan (modersmål 200 čuoggá) dahje ođđaáigásaš giellan (moderna språk 200-300 čuogga).
- Sámegiela gáibádusa sáhttá maid deavdit sámegiela lohkanbadjeoahpuin, 30 oahppočuoggá, dahje vástideaddji oahpuin, dahje ceavzit sámegiela giellageahččaleami maid Sámi allaskuvla lágida.
