BA - Jahkeovttadat

OAP Praktihkalaš pedagogalaš oahppu

60 oahppočuoggá (30 oč pedagogihkka + 30 oč fidno-/fágadidaktihkka)
Oahpahusbáiki: 3–5 beaivásaš deaivvadeamit guovtte -golmma háve lohkanbajis Sámi allaskuvllas, ja muđui neahttavuđot oahppan.
Oahpu lágideapmi: Oasseáiggeoahppu njeallje (4) lohkanbaji badjel. 60 beaivvi láidestuvvon hárjehallan skuvllas.
Oahpahusgiella: Sámegiella. Logaldallamat sáhttet maid leat skandinávalaš- dahje eaŋgalašgillii.

Bargovejolašvuođat
Leat go don lohkan fágaid mat oahpahuvvojit skuvllas? Háliidivččet go oahpaheaddjevirggi, muhto váilu pedagogalaš gelbbolašvuohta? Praktihkalaš pedagogalaš oahppu (PPO) addá oahpahangelbbolašvuođa dan fágasuorggis, mas leat ovdal váldán alit oahpu. Geahča gáibádusaid virgáibidjamii ja oahpaheapmái láhkaásahusas.

Sámi allaskuvla fállá praktihkalaš-pedagogalaš oahpu vuosttamužžan sidjiide geain lea fidno-/fágavuođđu juogo sámegielas, boazodoalus/luonddudoalus dahje duojis. Eará fidno-/fágavuođuide fállat dušše jus leat resurssat ja hárjehallanskuvla. Eaktun lea maid ahte gártá studeantajoavku.

Sisdoallu

Oahppu kvalifisere áimmahuššat oahpu sámi dilálašvuođain, dás dovdat eamiálbmogiid stáhtus riikkaidgaskasaččat, ja sámi mánáid ja nuoraid riekti oahpahussii iežaset giela ja kultuvrra vuođul. Vuolggasadjin lea sámi oahppan- ja bajásgeassinvuogit. Eamiálbmotdidaktihkas lea guovddáš sadji, ja hástalusat mat gusket gažaldagaide mo sáhttá sámi skuvlla ovdánahttit.

Oahppanteoriijain ja bargohárjehallamiin oahpat plánet, čađahit ja árvvoštallat oahpahusa.

Stipeandavejolašvuođat
Sámedikkis lea vejolaš ohcat stipeandda. Oahpahusdirektoráhta fálla maid skuvlaeaiggádiid bokte stipeandda.

Fuomáš!
2019 čavčča rájes čavgejuvvo sisabeassangáibádus. Dan rájes gáibiduvvo masteroahppu jus galggat beassát PPO:ii dábálaš fágaid váras.
Geahča láhkaásahusa PPO dábálaš fágaide váras.

Sisabeassangáibádusat

Sisabeassaneaktun lea okta dain oahppoduogážiin:

180 oahppočuoggá universitehta- dahje allaskuvlaoahppu. Unnimus 60 oahppočuoggá čiekŋudeapmi sámegielas ja girjjálašvuođas, boazodoalus/luonddudoalus dahje duojis.
golmma jahkásaš profešuvdnii heivehuvvon bachelorgráda ja unnimus guokte jagi ámmáhii relevánta praksis.
fága-/svennereive dahje eará golmma jahkásaš fidnooahppu joatkkaskuvladásis, dábálaš oahppogelbbolašvuohta, guokte jagi relevánta fidnoteorehtalaš oahppu joatkkaskuvlla maŋŋá ja njeallje jagi fidnopraksis.
Ásahus sáhttá árvvoštallat ohcciid reálagelbbolašvuođa vuođul PPOii fidnofágaide.
Sámegiellagáibádus: Sámegiela gáibádusa sáhttá deavdit čuovvovaš vugiid mielde: Sámegiella 1. dahje 2.giellan joatkkaskuvllas, Suoma bealde logahaga eatnigielladutkkus dahje guhkes amasgielladutkkus ja Ruoŧa bealde ges Modersmål A, B ja C dahje dušše A ja B. Sámegielagáibádusa sáhttá maid deavdit Davvisámegiela lohkanbadjeoahpuin 30 oč dahje vástideddjiin, dahje ceavzit sámegiela geahččaleami man Sámi allaskuvla lágida.
Muđui čujuhit universitehtaid ja allaskuvllaid oktasaš sisaváldinnjuolggadusaide
Forskrift om opptak til høyere utdanning.
Kápihttal 6 vuođul gáibiduvvo politiijaduođaštus oahpuin gos studeanttat leat oktavuođas mánáidgárdemánáiguin ja ohppiiguin dahje earáiguin oassin hárjehallamis.