Rektor
![](http://samas.no/sites/default/files/styles/hovedbilde/public/gunvor_guttorm_4.jpg?itok=HFMvi1Jd)
Gunvor Guttorm lea áigodagas 2015- 2019 Sámi allaskuvlla rektor.
Professor Dr. Art Gunvor Guttorm
Guttorm lea bargan Sámi allaskuvllas dan rájis go dat álggahuvvui 1989. Son lea eará bargoguimmiiguin álggahan duodjeoahpuid Sámi allaskuvllas; álggos oahpaheaddjioahpuin ja dađistaga duodjebachelora ja mastera. Son čađahii PhD dáiddasuorggis Tromssa universitehtas. Son lea jagi leamaš Duodji-, luonddu- ja ealáhusgoađis goahtejođiheaddji. Maŋimuš golbma jagi lea leamaš koordináhtorin duodjemasteris. Son lea 2013 rájis leamaš Sámi allaskuvlla stivrra fágabargiid áirrasin. Norgga dutkanráđi sámeprográmma stivrras lea son čohkkán 2012 rájes.
Oanehaččat Gunvor Guttorm birra:
- Riegádan 1958 ja bajásšaddan Kárášjogas.
- Sus lea báiki ja bearaš Johkamohkis.
- Lea guhká bargan Sámi allaskuvllas
- Bargan studeanttaiguin vuođđooahpus gitta masterdássái, ja gaskkustan duoji ja duodjejurddašeami sihke báikegottiide ja riikkaidgaskasaš dutkanbirrasiidda.
- Jahkásaččat daid maŋimuš jagiid lea leamaš váldologaldallit sierra sisriikka ja riikkaidgaskasaš konferánssain.
Su váibmoáššit leat:
- Sámi allaskuvla mii lea luohtehahtti ja geasuha studeanttaid juohke guovlluin Sámis
- Gulahallan siskkáldasat ásahusas, ja olggobeale ásahusa
- Iešheanalaš Sámi allaskuvlla mii buvttada njunuš dutkama máilmmi ja álgoálbmotdásis
- Sámi allaskuvla mas duodje- ja dáiddalašfágat leat guoddi fágat