SÁM Lullisámegiella praktihkalaš dilis- álgooahppu 1 (Plassje/Røros)

• Oahpahusgiella: Lullisámegiella
• Oahpahusbáiki: Aajeges, Plassjes/Rørosas
• 15 oahppočuoggá

Aajege Saemien giele- jih maahtoejarnege/ sámi giella - ja gelbbolašvuođaguovddáš lágida 15 oahppočuoggá lullisámegiela álgooahpu 1:ža intensiivaoahppun, ovttasráđiid Sámi allaskuvllain čakčalohkanbajis 2017.

Ulbmil:

Váldoulbmil lea ovddidit ja ovdánahttit vuođđogiellamáhtu buohkain geat háliidit oahppat lullisámegiela, ja ii leat gáibádus lullisámegiellamáhttui ovdalaččas. Studeanttat besset oahpahallat nu olu lullisámegiela ahte ohppet álkes ságastallamiidda searvat, ja maid lohkat álkes teavsttaid. Áŋgiris oassálastán lea eaktun oahppamii. 

Viidodat ja organiseren:

Oahppu addá 15 oahppočuoggá allaskuvladásis, ja lea vejolaš ohcat doarjaga Stáhta loatnakássas ja Sámedikki alit oahpu stipeandaortnegis. Loga eambbo dáppe http://www.sametinget.no/Stipend-og-tilskudd. Oahpahus čađahuvvo Sámi allaskuvlla dohkkehuvvon oahppoplána mielde.

Oahpahus lea oktiibuot 150 diimmu, ja maiddái seamma olu ieš lohkan. Oahppu lágiduvvo intensiivaoahppun Plassjes čakčat 2017. Oahpahusvahkuid lea oahpahus juohke árgabeaivvi.

Sisdoallu:

Čađat olles oahpus čalmmustahttojuvvo hupman dahje ságastallan. Oahpahus láhččojuvvo heivvolaš ja áigeguovdilis fáttáid birra nu go omd: Studeanta ieš, su bearaš, ruovttus viesus, luonddus, lagasbirrasis, biebmu, boazodoallu, árbevierut jna. Ođđa sánit, giellahárjehallan ja grammatihkka leat heivehuvvon juohke fáddái, gos mii bargat njálmmálaš hárjehusaiguin, dialogaiguin ja spealuiguin. Studeanttat besset hárjehallat ságastallat iešguđetge beaivválaš dilálašvuođain. Ieš lohkamis geavahuvvojit girjjit "Saemesth amma- Sørsamisk for nybegynnere bok 1 og 2" ja "OAHPA!- Åarjel".

Lohkanbadjedivat:    

Studeanttat fertejit máksit lohkanbadjedivada 400 ruvnno. Dasa lassin oassálastit fertejit ieža máksit oahppomateriálaid, mátkegoluid ja orruma/ biepmu.

Oahppu álggahuvvo eavttuin ahte leat unnimusat 6 studeanta geat váldet oahpposaji. Oahpposajiid juohkit dađistaga ohcciide. Oahpus leat 12 oahpposaji.

Jus leat beroštuvvon dán oahpus dahje háliidat eambbo dieđuid, váldde oktavuođa Toini Bergstrøm tlf. 90723513 dahje e-boastta toini.bergstrom@stfk.no.