SÁM400 Dieđateoriija

Kurssa (oahppoovttadaga) hálddaša Gielladieđagoahti

Studerenbáiki: Sámi allaskuvla
Oahpahusgiella: sámegiella
Viidodat: 5 oč.

Oanehaččat oahppofáttá birra

Oahppu addá viiddis dieđuid ja áddejumi diehtagiid vuođđoságastallamiin ja dieđateorehtalaš vuolggasajiin ja geahčastagain earenoamážit servodat- ja humanisttalaš diehtagiin. Oahppu sisttisdoallá guorahallamiid sihke oppalaš dieđateorehtalaš jurddašanmálliin ja ovttaskas fágaid vuođuštanságastallamiin.

Maid don oahpat?

Oahpu maŋŋá don

- ipmirdat ja máhtát guorahallat fágaid vuođuštanváttisvuođaid ja dieđateorehtalaš vuolggasajiid ja geahčastagaid.

- máhtát guorahallat beliid iežat doavttirgrádaprošeavttas vuođuštanteorehtalaš ja dieđateorehtalaš ságastallamiid vuođul.
 

Oahpahus- ja oahppanvuogit

Kursii gullet logaldallamat, seminárat ja iehčanas čállinbargu. Logaldallamiin guorahallojit dieđateorehtalaš vuolggasajit ja ovttaskas fágaid vuođuštanságastallamat. Ovdabargun lea čállit 3–5 siiddu guhkkosaš čállosa iežas doavttirdutkamuša teorehtalaš ja metodologalaš beliin. Ovdabargu galgá guđđot sisa maŋimustá 15.8.2016. d. 9:00. Čálus guorahallo guovtti oktasaš čállinsemináras.
 

Sisabeassangáibádusat ja almmuheapmi

Sisa besset sámegiela ja sámi girjjálašvuođa doavttirgrádastudeanttat ja studeanttat, geain lea vástideaddji studerengelbbolašvuohta.

Diehtu sisabeassamis sáddejuvvo e-poasttain 1-2 vahku ohcanáigemeari maŋŋá.

Oahpahusplána

Kurssas leat guokte čoagganeami:

Čakčat 2016: 18.–19.08.

Giđđat 2017: 13.–15.02.

Temát ja fáttát 18.–19.8. (d. 09:15–11:00 ja 12:00–15:00):

• Dieđu, diehtaga ja teoriijaid luondu

• Dieđalaš metodat

• Ságastallan studeanttaid doavttirdutkamuššii guoski teorehtalaš ja metodologalaš áššiin

Studeanttat fertejit searvat aktiivvalaččat logaldallamiidda ja semináraide.

Eksámen

Ruoktoeksámen, mii lea 3500 sáni guhkkosaš čálus. Čállosa sáhttá geavahit doavttirdutkamuša oassin. Bargu árvvoštallojuvvo oahppanjoksosiid ektui.

Árvosátni: Ceavzán / Ii ceavzán 

Oahpahusa árvvoštallan

Mii ávžžuhit studeanttaid árvvoštallat oahpu vai máhttit buoridit iežamet fálaldagaid. Sámi allaskuvllas lea kvalitehtasihkkarastinvuogádat, mainna sáhttá árvvoštallat ásahusa oahppofálaldagaid ja bálvalusaid.
 

Lohkanmearri

Sohppojuvvon oasit dáid girjjiin:

• Alex Rosenberg 2012: Philosophy of Science: A Contemporary Introduction. New York & London: Routledge.

• Mark Risjord 2014: Philosophy of Social Science: A Contemporary Introduction. New York & London: Routledge.
   

Goas ja mo ozat ohppui?

Raba ohcanskovi dás: Dieđateoriija ohcanskovvi.

Ohcanáigemearri: 1.6.2016

Lassedieđut: Professor Ánte Aikio, Ante.Aikio@samiskhs.no.