Sámi allaskuvlla oasseáiggi journalistaoahput 2016/17
Sámi allaskuvla fállá oahppojagi 2016/17 gávcci oanehis kurssa journalistihkas. Kurssat heivejit oasseáigestudeanttaide ja erenoamážit journalisttaide geat juo leat barggus Sámi mediain.
Ohcanáigi lea borgemánu 26. beaivvi.
Kurssat heivejit sihke olbmuide geat juo barget journalistan ja studeanttaide geat leat beroštuvvan journalistihkas. Buot kurssat addet 5 oahppočuoggá ja studeanttat sáhttet áiggi mielde háhkat alcceseaset bachelorgráda journalistihkas.
Sámi allaskuvllas lea áigumuš álggahit Visuála journalistihka Bacelorprográmma 2017 čavčča. Journalistihka kurssat mat lágiduvvojit 2016/17 heivejit oassin Bachelorprográmmas nu ahte studeanttat geat váldet dáid kurssaid boahtte skuvlajagi, ožžot nu gohčoduvvon sisaheiveheami, eaige dárbbaš lohkat seammá fáttáid ođđasit. Visuála journalistihka bacheloras šaddá deattuhit multimediála dokumentáraid ja digitála mediaid almmuheami.
Čavčča oahput leat dál ohcanládje SøknadsWebas.
Fálaldagat čakčat 2016 leat:
- Ođasjournalistihka álggahankursa 1:š 5 oč
- Kulturjournalistihkka 5 oč
- Giellagáhtten 1 - 5 oč
- Sámi servodatoahppu 5 oč
Fálaldagat giđđat 2017 leat:
- Ođasjournalistihka álggahankursa 2:š 5 oč
- Kommentárajournalistihka 5 oč
- Giellagáhtten 2 - 5 oč
- Álgoálbmot servodatdiehtu 5 oč
Eanet dieđuid kurssaid sisdoalu ja lágideami birra addiba
Mikkel Ole Eira: +47 78 44 85 58 studieadm@samiskhs.no dahje mikkeloe@samiskhs.no
Torkel Rasmussen: 78448471 dahje +358 40 41 870 40 torkel.rasmussen@hotmail.com
Kurssaid sisdoalu birra:
Ođasjournalistihka álggahankursa 1:š 5 oč
Studeanttat oahpásmuvvat ođasjournalistihka vuođđoáššiide, ja ohppet čállit ođasáššiid aviisa ja neahttamedia várás, govvet journalisttalaš govaid ođasáššiid várás ja gieđahallat govaid elektrovnnalaččat.
Studeanttat ohppet teorehtalaš ja geavatlaš barggu bokte journalisttalaš govaid geavaheami birra ja journalisttalaš sáhkkeheami birra ođasartihkkaliid várás. Sii ohppet čállit ja hukset ođasartihkkaliid, oahpásmuvvet gáldokritihkkii ja hárjehallet árvvoštallat ođđasiid ođasárvvuid ja ođasjournalisttalaš etihka.
Studeanttat geat háldejit rádio ja TV-mediašlájaid sáhttet ráhkadit ođđasiid daid mediaid várás.
Kulturjournalistihkka 5 oč
Studeanttat ohppet kulturjournalistihka iešguđet šáŋŋeriid mas kultuvra- ja dáiddakritihkka lea deháleamos oassi. Dasa lassin sii oahpásnuvvet sámi kulturorganisašuvnnaide ja ohppet geavahit kultureallima vuođđun ođđasiid ráhkedeames.
Studeanttat oahpásmuvvet iešguđetge dáiddašlájaide ja besset iežas beroštumiid mielde válljet árvvoštallet muhtin daid čuovvovaš dáiddašlájain: dáiddaduodji, govvadáidda, installašuvnnat, girjjálašvuohta, musihkka, teáhter ja filbma.
Studeanttat geain lea teknihkalaš gelbbolašvuohta, sáhttet ráhkadit árvvoštallamiid TV-, rádio- dahje neahttamediaide. Eará studeanttat čovdet geatnegahtton bargguid dainna lágiin ahte buktet čálalaš árvvoštallamiid oktan govaiguin.
Giellagáhtten 1 - 5 oč
Giellagáhtten 1 lea láidehus giellagáhttemii. Giellagáhtten 1:ža figgamuššan lea buoridit studeanttaid gielalaš diđolašvuođa ja čalmmustahttit journalistta rolla gielalaš váikkuheaddjin sámi servodagas. Studeanttat ohppet muhtun guovddáš giellagáhttenáššiid: lohkosánit, adjektiivvaid veardidanhámit, kásusiid geavaheapmi, infinihttahámit ja konditionála. Iešguhtege ášši analyserejuvvo journalisttalaš teavsttain ja studeanttaid iežaset čállosiin čoggojuvvon ovdamearkkaid vuođul. Dasa lassin studeanttat ohppet geavahit giellaoahpaid, sátnegirjjiid ja interneahta materiálaid ee. kártasiidduid veahkkeneavvun.
Sámi servodatoahppu 5 oč
Sámi servodatoahpus studeantat ohppet árvvoštallat ja analyseret sámi servodahkii guoski diliid, ja oahpásmuvvet eará álgoálbmogiidda ja álgoálbmogiid sajádahkii riikkaidgaskasaš servodagas. Studeantat ohppet dovdet iešguđetlágan servodatlaš proseassaid Sámis, sihke báikkálaš, riikkadását ja miehta Sámi proseassaid giellasosiologalaš diliide.
