Sisaváldingáibádusat
- Gáibádussan beassat studeantan Sámi allaskuvlii lea 1) oppalaš lohkangelbbolašvuohta dahje 2) reálagelbbolašvuohta.
- Lassin gáibiduvvo 3) dihto sámegielmáhttu vuođđooahpuide ja eanaš eará oahppofálaldagaide.
- Muhtin oahppofálaldagain sáhttet leat erenoamáš gáibádusat, mat čilgejuvvojit sierra iešguđet oahppofálaldagas.
1) Oppalaš lohkangelbbolašvuohta
Oppalaš lohkangelbbolašvuohta oažžu
- go ceavzá joatkkaskuvlla/logagaha/gymnasieskuvlla (golbma jagi) dahje
- go lea fágareive dahje svennereive ja vuolimus gáibádusfágat, dahje
- go lea deavdán 25 jagi ja oktiibuot vihtta jagáš bargo/oahppoduogáš ja vuolimus gáibádusfágat.
Vuolimus gáibádusfágat
Allaskuvlaoahpuin gáibiduvvojit vihtta fága maid ferte ceavzán unnimusat árvosániin 2 (ng), mat dagahit vuolimus fágagáibádusa. Nu gohčoduvvon bákkolaš fágat leat:
- Dárogiella JKII-dásis 14 vahkkodiimmu / 393 diimmu dahje 11 vahkkodiimmu/ 309 diimmu ohppiide geat leat maid lohkan sámegiela 11 vahkkodiimmu/ 309 diimmu dahje suomagiella 11 vahkkodiimmu/ 309 diimmu
- Eŋgelasgiella vihtta vahkkodiimmu / 140 diimmu
- Servodatfága guhtta vahkkodiimmu / 84 diimmu servodatfága + 140 diimmu historjá*
- Luonddufága vihtta vahkkodiimmu / 140 diimmu
- Matematihkka vihtta vahkkodiimmu / 224 diimmu
* Ohppiin geain leat 309 diimmu dárogielas + 309 diimmu sámgielas/suomagielas galgá dušše leat 113 diimmu historjá.
Fuomáš I: Ohccit geat leat eará davviriikkain eret go Norggas sáhttet gokčat dárogiellagáibádusa ruoŧagielain/ suomagielain/ dánskagielain/ ruonáeatnangielain/ islánddagielain/ færsullogielain.
Fuomáš II: Vuođđoskuvlaoahpaheaddjioahpuide Norggas leat sierra sisaváldingáibádusat. Loga eanet dás.
2) Reálagelbbolašvuohta
Lea vejolaš ohcat oahpuide reálagelbbolašvuođa vuođul. Ohcci bargo- ja oahppoduogáš árvvoštallo dan oahppofálaldaga gáibádusaid ektui masa ohcá. Gáibádussan lea:
- ahte ohcci galgá deavdán 25 jagi dahje deavdá 25 jagi dan oahppojagi go álgá ohppui, ja
- ahte sus berre leat unnimusat vihtta jagáš bargo/oahppovásáhus, ja
- persovnnalaš heivolašvuohta ohppui.
3) Gelbbolašvuohta sámegielas
Sámi allaskuvlla vuođđuoahpuin ja eanaš eará oahppofálaldagain gáibiduvvo dihto dási sámegiel máhttu. Sámegiela máhtolašvuhtii vuolimus gáibádusat leat:
- Norgabealde joatkkaskuvllas sámegiella vuosttaš- dahje nubbingiellan.
- Suomabealde logahagas eatnigielladutkkus dahje guhkes amasgielladutkkus.
- Ruoŧabealde gymnasieskuvllas eatnigiella A, B ja C/ modersmål A, B ja C.
- Sámegiella lohkanbadjeoahppu 30 oahppočuoggá dahje vástideaddji oahppu.
- Giellageahččaleapmi maid Sámi allaskuvla lágida.
