Dieđit buriid ja baháid

Spiehkastanskovvi bokte sáhtát dieđihit buriid ja baháid. 

Sámi allaskuvla háliida doalahit buori kvalitehta buot osiin doaimmastis ja mii háliidit ahte don galggat vásihit buori bálvaleami mis. Danne leat mii giitevaččat jus studeanttat, bargit, ohccit ja earát dieđihit midjiide mo sii vásihit min doaimma. Mii áinnas háliidit diehtit mo dii vásihehpet min doaimma, man ovddas mii ánssášit rámi ja maid berret buoridit. Dát skovvi sáhttá geavahuvvot juste dasa. Áinnas rámit min, muital mainna it leat riekta duhtavaš ja buvtte áinnas buriid jurdagiid buoridandoaimmaide.  

Dieđiheamit sáhttet ovdamearkka dihte guoskat:

• Bálvaleapmái ja hálddahuslaš beliide
• Fysalaš beliide, lanjaide, vistái
• Elektrovnnalaš fasilitehtaide

Dát doaibma ii galgga buhttet beaivválaš gulahallama gaskkal studeantta ja bargi. Studeanttaid dieđiheamit mat njuolgut gusket oahpahussii galget dieđihuvvot fágaoahpaheaddjái, oahppojođiheaddjái, koordináhtorii, luohttámušolbmui, oahppohálddahussii jna.

Spiehkasteapmi lea kvalitehtamihtuid váilevaš olaheapmi. Spiehkasteamit leat maid dilálašvuođat ja dáhpáhusat mat hehttejit Sámi allaskuvlla doalahit ja buoridit kvalitehta. Obbalaččat sáhttá lohkat ahte spiehkasteapmi mearkkaša ahte juoga ii leat nu mo mii definerejuvvon kvalitehtagáibádusaid vuođul álgoálggus eaktudeimmet ahte dat galggai leat. Dát sáhttá leat:

• Vahát, lihkohisvuohta ja measta lihkohisvuođat
• Boasttuvuođat ja váilevašvuođat
• Lágaid ja láhkaásahusaid rihkkun
• Siskkáldas rutiinnaid ja njuolggadusaid rihkkun
• Boasttuárvvoštallamat  
• Váilevašvuođat sosiálalaš ja fysalaš oahppobirrasis, oahpahusa ja oahppandoaimmaid kvalitehtas, oahpuid hálddašeamis jna.

Raporterema ulbmil lea sihkkarastit ahte spiehkasteamit registrerejuvvojit ja biddjojit viidásit rievttes olbmui, nu ahte dárbbašlaš doaimmat sáhttet biddjot johtui eastadan, gávdnan ja divvun dihte boasttuvuođaid ja váilevašvuođaid.