2011 stáhtarehketdoallu ovddiduvvon

2011 stáhtarehketdoalu oljodivoduvvon vuolláibáza šattai 79,4 miljárdda kruvnno. Dat lea 4,8 miljárdda kruvnno unnit go ođđasalderejuvvon bušeahtas, mii nannejuvvui juovlamánus 2011. Oppalaš boađut ledje 6,1 miljárdda kruvnno stuorábut ja oppalaš golut fas 1,3 miljárdda kruvnno stuorábut go ođđasalderejuvvon bušeahtas.

Stáhta olgoriikka penšuvdnafoanddas (SPU) leat sirdojuvvon 84,2 miljárdda kruvnno stáhtabušehttii. Dat vástida oljodivoduvvon vuolláibáhcagii ođđasalderejuvvon bušeahtas, maid Stuorradiggi nannii juovlamánus 2011. Oljodivoduvvon vuolláibáza šattai rehketdoalus 79,4 miljárdan kruvdnon, ja stáhtarehketdoalu boađus lei nappo 4,8 miljárdda kruvnno badjebáza.

Go buohtastahttit 2011 salderejuvvon bušeahtain (maid Stuorradiggi nannii juovlamánus 2010), oljodivoduvvon vuolláibáza šattai 55,6 miljárdda kruvnno unnit. Boađut šadde 51,1 miljárdda kruvnno stuorábut, golut fas šadde 4,5 miljárdda kruvnno unnibat. Sullii 40,0 miljárdda kruvnno lassánan boađuin leat stuorát vearro- ja divatboađut, 4,1 miljárdda kruvnno leat lassánan reanto- ja vuoitoboađut ja sullii 6,4 miljárdda kruvnno leat departemeanttaid lassánan boađut. Golut leat geahppánan earret eará daningo reantogolut ja álbmotoaju beaiveruhtagolut leat geahppánan. Rehkenastet, ahte golut leat duohtavuođas lassánan 1,7 proseantta 2010 rehketdoalu rájes 2011 rehketdoalu rádjai.

Bušeahttapoasttaid geavatkeahtes juolludeamit, mat leat merkejuvvon «sáhttá sirdojuvvot» ja eanemusat 5 proseantta doaibmagoluid poasttaid geavatkeahtes juolludemiin sáhttet sirdojuvvot maŋit bušeahttaáigodahkii. Oktiibuot leat 44,4 miljárdda kruvnno sirdojuvvon 2012:i. Das 33,3 miljárdda kruvnno guoská erenoamáš juolludeapmái stáhta eksportaruhtadanortnega gaskaboddasaš loatna mii mearriduvvui juovlamánus 2011. Dán poastta lassin leat 11,1 miljárdda kruvnno sirdojuvvon 2012:i. Dat lea 0,3 miljárdda kruvnno eanet go ovddit jagi.

Petroleumboađuid geavaheapmi, mii mihtiduvvo strukturála, oljodivoduvvon vuolláibáhcagiin, rehkenastojuvvo 94,1 miljárdan kruvdnon 2011. Dat lea sullii 34 miljárdda kruvnno unnit go mii 2011 Nationálabušeahtas árvaluvvui ja 4,9 miljárdda kruvnno unnit go mii rehkenastojuvvui ođđasalderemis (maid Stuorradiggi nannii juovlamánus 2011). SPU 2011 reálavuoitun vurdojuvvo 123,2 miljárdda kruvnno, mii vástida 4 prosentii foanddas jagi álggus. Petroleumboađuid geavaheapmi šattai nappo sullii 29 miljárdda kruvnno unnit, go SPU navdojuvvon reálavuoitu. Strukturála, oljodivoduvvon vuolláibáza boahtá ovdan dan láhkai, ahte oljodivoduvvon bušeahttabalánsa divustuvvo earret eará dan ektui, mo stáhtabušeahta vearroboađuid konjunktuvrrat váikkuhit.

Stáhtarehketdoallu čájeha, ahte oljodoaimmaid nettoboađut ledje 350,8 miljárdda kruvnno. Submi sirdojuvvui SPU:i, ja ođđasalderejuvvon bušeahta mielde fas sirdojuvvui 84,2 miljárdda kruvnno stáhtakássii. Stáhta penšuvdnafoandda nettoreantoboađut ja vuoitu šattai oktiibuot 103,0 miljárdda kruvnno, mas 97,0 miljárdda kruvnno lei SPU:s ja 6,0 miljárdda kruvnno Norgga Stáhta penšuvdnafoanddas. Stáhta penšuvdnafoandda badjebáza lei nappo 369,7 miljárdda kruvnno. Das lea SPU badjebáza váile 363,7 miljárdda kruvnno. Stáhtabušeahta badjebáza (4,8 miljárdda kruvnno) ja Stáhta penšuvdnafoandda badjebáza (369,7 miljárdda kruvnno) šattai oktiibuot 374,4 miljárdda kruvnno.

SPU márkanárvu lassánii 227,1 miljárddain kruvnnuin, 3 080,9 miljárdda kruvnnos 2010 loahpas gitta 3307,9 miljárdda kruvdnui 2011 loahpas. Badjebáza lasiha foandda árvvu 363,7 miljárddain kruvnnuin, eará dilit fas geahpededje kapitála 136,6 miljárddain kruvnnuin. Das lei foandakapitála nettovaluhtakursavuoitu 49,2 miljárdda kruvnno, realiserejuvvon ja realiserekeahtes táhpat fas geahpededje foandda kapitála 185,8 miljárddain kruvnnuin.

2010 loahpas gitta 2011 lohppii Norgga Stáhta penšuvdnafoandda kapitála geahppánii 5,4 miljárddain kruvnnuin, 134,9 miljárdda kruvnnos 129,5 miljárdda kruvdnui. Rievdadusa sivvan leat 6,0 miljárdda kruvnno nettoreantoboađut ja vuoitu ja oktiibuot netto 11,4 miljárdda kruvnno realiserejuvvon ja realiserekeahtes táhpat oasus- ja reantosajuštemiin.

 

2011 bušeahttajagi rehketdoallu, salderejuvvon ja ođđasalderejuvvon bušeahtta

	(logut miljovdnan kruvdnon)	Salderejuvvon bušeahtta (juovlam. 2010)	Ođđasalderejuvvon bušeahtta (juovlam. 2011)	Rehketdoallu (cuoŋománnu 2012)
1.	Stáhtabušeahtta
A	Boađut oktiibuot	1 113 185	1 218 699	1 223 525
A.1	Boađut petroleumdoaimmain	313 018	373 493	372 242
A.2	Boađut petroleumdoaimmaid olggobealde	800 167	845 206	851 283
B	Golut oktiibuot	960 149	950 365	952 121
B.1	Golut petroleumdoaimmain	25 011	21 002	21 439
B.2	Golut petroleumdoaimmaid olggobealde	935 138	929 363	930 682
	Stáhtabušeahta oljodivoduvvon badjebáza (A.2-B.2)	-134 971	-84 158	-79 399
+	Sirdojuvvon Stáhta olgoriikka penšuvdnafoanddas	134 971	84 158	84 158
=	Stáhtabušeahta badjebáza ovdal loatnatransakšuvnnaid	0	0	4 758
2.	Stáhta penšuvdnafoanda
	Netto reaidaruhtarávdnji petroleumdoaimmas stáhtabušehttii (A.1-B.1), sirdojuvvo Stáhta olgoriikka penšuvdnafondii	288 007	352 491	350 804
-	Sirdojuvvon Stáhta olgoriikka penšuvdnafoanddas stáhtabušehttii	134 971	84 158	84 158
+	Foandda reantoboađut ja vuoitu	113 100	104 200	103 004
=	Stáhta penšuvdnafoandda badjebáza	266 136	372 534	369 650
3.	Stáhtabušeahtta ja Stáhta penšuvdnafoanda
	Badjebáza oktiibuot	266 136	372 534	374 408