1 miljon ruvnnu eanet Máilmmi čuoigangilvvuid eaktodáhtolašvuođaprošektii

Kulturministtar Anniken Huitfeldt čalmmustii ahte odne leat 100 beaivvi vel dasságo Máilmmi čuoigangilvvut álget Holmenkollenis juolludettiinis 1 miljon ruvnnu lassin Máilmmi čuoigangilvvuid eaktodáhtolašvuođaprošektii. Dát boahtá lassin 1 miljon ruvdnui maid departemeanta juolludii Máilmmi čuoigangilvvuid eaktodáhtolašvuođaprošektii jagi 2009.  

- Eaktodáhtolaš bargu lea dehálaš kultur- ja valáštallangilvvuid čađaheapmái. Máilmmi čuoigangilvvut leat váldán atnui ođđa vugiid háhkan dihtii eaktodáhtolaš bargiid. Doaibman eaktodáhtolaš bargin lea dehálaš sidjiide ge geat servet, cealká kulturministtar Anniken Huitfeldt. - 2 200 eaktodáhtolačča ožžot oahpahusa mii gealbuda sin doibmii. Dán sáhttet eará ge eaktodáhtolaš organisašuvnnat geavahit ávkin, dadjá kulturministtar Anniken Huitfeldt.

Prošeakta lea nákcen háhkat ollu nissonolbmuid, nuoraid vuollil 30 jagi ja olbmuid geain lea máŋggakultuvrralaš duogáš. Lassejuolludus dagaha ahte Máilmmi čuoigangilvvuid eaktodáhtolašvuođaprošeakta váikkuha dasa ahte lea vejolaš lahkanit ulbmila oaččohit áigái šláddjes eaktodáhtolašvuođabargiid joavkku.  

Eaktodáhtolaččaid oahpahusprográmma sisttisdoallá web-uskádaga, e-oahpahusprográmma ja čoahkkanemiid. Oahpahusa fáttát leat leamaš Máilmmi čuoigangilvvuid niehkodoaivagat ja árvvut, arenaoahppa, lágideaddji guoibmásvuohta, biras, gearggusvuohta ja HMS (dearvvašvuohta, biras ja dorvvolašvuohta), šláddjivuohta ja kulturáddejupmi, vuosttaš heahteveahkki ja eará fágaid suorggit.

 

Govva: Christian Ruscetta, Ski-VM 2011