Boasttuvuođat oljohatti ja stáhtabušeahta hárrái

Stavanger Aftenblad dramáhtalaš ovdasiidu golggotmánu 7. b. čájeha váilevaš áddejumi das, mo oljohaddi váikkuha bušehttii. Das čuoččuhuvvo ahte jos 2012 oljohaddi šaddá vuolit, go maid Ráđđehus lea geavahan vuođđun bušeahttaárvalusastis, de dat mielddisbuktá, ahte 2012 bušeahta ferte vuolidit sakka. Nu ii leat.

Doaibmanjuolggadus dat mearrida man ollu oljoruđaid mii sáhttit geavahit stáhtabušeahtas. Dat muitala, ahte mii sáhttit juohke jagi geavahit sullii njeallje proseantta stáhta olgoriikka penšuvdnafoanddas. Doaibmanjuolggadus veahkehage suddjet bušeahta, nu ahte petroleumboađuid oanehis áiggi rievdadusat eai dasa čuoza.

Oljohatti meroštallamii laktása stuorra eahpesihkarvuohta, ja dat vuhtto earret eará das, ahte ovddalgihtii meroštallojuvvon oljohattit molsašuvvet sakka. Dan vuođul departemeantta meroštallamiid ii sáhte atnit čielgasit optimisttalažžan. Seammá beaivvi go bušeahtta geigejuvvui, de čájehii termiidnamárkan 2012 oljohaddin badjelaš 100 dollára fárpalis, mii lea oalle lahka 2012 nationálabušeahta árvvoštallama.

Liikká mii suddjet bušeahta oljohatti rievdademiin. Min buorredilli ii galgga rievdat oljohatti rievdademiid mielde. Danin geavahuvvoge vuođđun dat submi, mii Stáhta olgoriikka penšuvdnafoanddas lea 2011 loahpas, go rehkenastet 2012 foandavuoittu. 2012 oljohaddi váikkuhage bušeahta doaibmamunnái easkka maŋit jagiid.

Háliidan gal deattuhit, ahte dat ii mearkkaš, ahte máilmmi ekonomiija riikkaidgaskasaš hedjoneapmi ii čuozáše Norgii, jos omd. oljohattit njiejašedje nannosit. Muhto livččii áibbas boastut bušeteret dál nana hedjoneami vuođul. Min buoremus bealuštus lea nana gearggusvuohta, mainna dustet heajos áiggiid rievttes doaimmaiguin rievttes áigge.