Ođasmahttin-, hálddahus- ja girkodepartemeanta (FAD) lea oktiiheivehalli departemeanta Ráđđehusa ođasmahttinbarggus. Departemeantta ovddasvástádussii gullet maiddái:
Nationála IKT-politihkka
FAD galgá váikkuhit dasa ahte almmolaš eiseválddit ráhkadit dakkár IKT-čovdosiid mat leat bevttolaččat, mat oskkáldasat doibmet ja mat leat olbmuide álkit geavahit. Departemeanta galgá čielggadit ja čuovvolit mo ođđa teknologiija ja lassáneaddji IKT-geavaheapmi váikkuhit servodahkii ja mo dat bohciidahttet ođđa vejolašvuođaid ja dárbbuid nuppastahttimiidda.
Gilvopolitihkka
Gilvopolitihkain galgá FAD váikkuhit eanet árvoháhkamii geavaheaddjiide ja ealáhusaide buorrin, ja dasa ahte gilvodeasttat doarvái fuolahuvvojit buot politihkkasurggiin. Gilvoláhka, láhka almmolaš háhkamiid birra ja láhka almmolaš doarjaga birra leat guovdilis bargoneavvut gilvopolitihkas.
Stáhta bargoaddipolitihkka
Dainnago FADas lea ovddasvástádus stáhtabargiid bálká- ja bargoeavttuin, de galgá FAD sihkkarastit searvadeaddji ja movttiidahtti bargiidpolitihkka. FAD hálddaša ja ovddida lágaid, dahká riikkaviidosaš ja bajimus tariffašiehtadusaid ja dahká njuolggadusaid ja vel rápmaeavttuid stáhta bargiid- ja bargoaddipolitihka várás. FAD galgá leat hoahpuheaddji, rávvejeaddji ja veahkeheaddji go lea sáhka rievdadeamis ja organisašuvdnaovddideamis hálddahusas, bargiidáššiin ja jođiheaddjiovddideamis stáhtas.
Huksen- ja opmodatpolitihkka
FADas lea bajimus ovddasvástádus dan huksen- ja opmodatpolitihkas mii gullá stáhta siviila suorgái. Stáhta huksenlágádus (Statsbygg) doaibmá stáhta hukseheaddjin ja dat hálddaša stuorra oasi buot stáhta opmodagain. FAD galgá Stáhta huksenlágádusa bokte fuolahit heivvolaš visttiid stáhta sierranas doaimmahusaide. Olámudduvuohta, biras, arkitektonalaš kvalitehta ja kulturhistorjjálaš árvvut leat dehálaš iešvuođat maidda biddjojuvvo deaddu.
Sámit ja nationála unnitlogut
FADas lea sámepolitihka olis ovddasvástádus das ahte sámi beroštumiid vuhtiiváldin lea mielde politihka hábmemis buot áššáigullevaš surggiin. FAD oktiiordne ja oktiiheivehallá oktavuođa Sámedikkiin. Nationála unnitlogut, kvenat, juvddálaččat, vuovdesuopmilaččat, rom-álbmot/sigøynárat ja románi-álbmot/táhterat galget vuhtiiváldojuvvot daid ulbmiliid mielde mat leat Eurohparáđi rápmakonvenšuvnnas nationála unnitloguid suodjaleami birra ja Unnitlohkogielaid lihtus.
Girkopolitihkka
Girkopolitihkka galgá fuolahit organisatoralaš ja ekonomalaš rápmaeavttuid Norgga Girkui nu ahte dat sáhttá leat ja doaibmat dovddasteaddji, vuolggaheaddji, bálvaleaddji ja rabas álbmotgirkun.
Hálddašanpolitihkka
FADas lea ovddasvástádus hálddašanpolitihkas, mii lea stáhtii vuođđu go dat vállje organisašuvdnahámiid ja čielggadanbargovugiid. Dát galget sihkkarastit demokráhtalaš stivrejumi ja buori áššemeannudeami. Stáhta gulahallanpolitihkain galgá FAD váikkuhit dasa ahte stáhta bures gulahallá ássiiguin, ealáhusaiguin ja preassain.
Personsuodjalus
Dannego FADas lea ovddasvástádus peršonsuodjaluspolitihka osiin, de galgá FAD lágidit dakkár servodaga mas ássit sáhttet luohttit dasa ahte čiegos dieđut eai almmuhuvvo daidda geaidda dat eai galgga.
Fylkkamánnet
Fylkkamánne lea stáhta bajimus ovddasteaddji fylkkas ja lea hálddahuslaččat FADa vuollásaš. Departemeanttas lea váldoovddasvástádus lágidit, sihkkarastit ja dárkkistit stivrenvuogádagaid kvalitehta, das lea váldoovddasvástádus organisašuvdnaovddideamis ja váldoovddasvástádus ámmáhiid rápmaeavttuin. Fylkkamánne čađaha bargamušaid 12 departemeantta ovddas ja juohke departemeanttas lea fágalaččat eanet váldi go ámmáhiin áigeguovdilis fágasurggiin. FADas lea bajimus ovddasvástádus regionála stáhtahálddašeami organiseremis ja juohkimis.
Politihkalaš bellodagat
FADas lea ovddasvástádus doarjagiin politihkalaš bellodagaide ja daidda gulli lágas. Láhka sisttisdoallá earret eará politihkalaš bellodaga registarastima eavttuid ja daid álmmolašvuođagáibádusaid mat gullet bellodagaid rehketdoaluide.
Ođasmahttin-, hálddahus- ja girkodepartemeanta ásahuvvui ođđajagimánu 1. beaivvi 2010. FAD lea Gonagaslaš Hoava oktavuođadepartemeanta. Departemeanttas lea ovddasvástádus arvat stáhtalaš oktasašbálvalusain mat gullet namuhuvvon politihkkasurggiide. FADas lea ovddasvástádus čuovvovaš vuolleetáhtaid stivremis:
- Hálddahusa ja IKTa direktoráhta (Direktoratet for forvaltning og IKT (Difi))
- Stáhta huksenlágádus (Statsbygg)
- Departemeanttaid bálvalusguovddáš
- Dáhtabearráigeahčču
- Gilvobearráigeahčču
- Bismagodderáđit
- Praktihkalaš-teologalaš seminára
- Girkoráđđi
- Nidarosa Duopmogirku Ovddeštanbarggut (Nidaros Domkirkes Restaureringsarbeider)
- Čuvgehuslágádusa foanda (Opplysningsvesenets fond)
- Gáldu – Álgoálbmotvuoigatvuođaid gelbbolašvuođaguovddáš
- Boazodoalu riikkaidgaskasaš fága- ja gaskkustanguovddáš
