Digitála giellareaiddut leat dehálačča giela ceavzimii

Ovdánahttimis digitála reaidduid sámi gielaide ii dušše guoskka vuoiggalašvuhtii ja dásseárvui. Dat lea mearrideaddjin dasa movt sámegiella sáhttá ceavzit.

Dan dajai Sjur Moshagen Divvun/Sámi giellateknologiija guovddážis Romssas, go son gaskavahku čilgii doaimmaideaset birra ođasmahttiministarii Rigmor Aasrudii ja stáhtačállái Raimo Valle.

Guovddáža áigumuš lea ráhkadit giellateknologalaš reaidduid iešguđet sámi gielaide. Dát sáhttet leat pedagogalaš prográmmat, teakstameannudanvuogádagat, digitála sátnegirjjit dahje digitála ságastallan. Dálá digitála máilmmis fertejit juohke gielas leat ollu resurssat vai sáhttet doaibmat hálddahusaláš- ja gulahallangiellan. Dán oktavuođas leat unnitlohkogielat áibbas eará dilis go eanetlohkogielat.

Divvun-prošeakta, mii álggahuvvui 2004, ovttasbargá lahkalaga guovddážiin, ja ovdánahttá sámegielat divvunprográmma  elektrovnnalaš teakstameannudeami várás. Prográmma lea nuvttá man sáhttá viežžat interneahtas. Lulli-sámi divvunprográmma galgá leat gárvvis ovdal jahkemolsuma. Prošeakta, mas leat guhtta bargi, lea nu ollášuhttán áigumušastis, muhto Sámediggi lea evttohan OHD´ii ahte Divvun prošektii ásahuvvo bistevaš doaibma- ja ovdánahttinorganisašuvdna 2011 rájes.

Govas: Ovddabealde, gurut ravddas: Sjur Moshagen, Maja Kappfjell ja Berit Anne Bals Baal  Divvun ovddasteaddjit. Maŋábealde: Stáhtačálli Raimo Valle ja stáhtaráđđi Rigmor Aasrud.