Dáin lea jienastanvuoigatvuohta stuorradiggeválggas:
Norgga stáhtalahtut guđet
- devdet 18 jagi ovdal válgajagi loahpa ja guđet
- leat, dahje leat leamaš, girjejuvvon Norgga ássin álbmotregistarii, ja guđet
- eai leat massán jienastanvuoigatvuođaset Vuođđolága § 53 vuođul.
Diplomatiija dahje konsuláhtalágádusa bargit ja sin bearašlahtuin lea jienastanvuoigatvuohta vaikko sii eai deavdde ássaneavttu. Jos sii eai leat goassege leamaš registarastojuvvon Norgga ássin, de galget girjejuvvot Oslo suohkana jienastuslohkui.
Ovdalgo don sáhtát jienastit stuorradiggeválggas, de fertet leat girjejuvvon muhtun gieldda jienastuslohkui.
Leatgo don čálihuvvon jienastuslohkui?
Jienasteaddjit guđet ásset Norggas:
Buot olbmuin geain lea jienastanvuoigatvuohta, čálihuvvojit automáhtalaččat dan gieldda jienastuslohkui masa ledje registarastojuvvon ássin geassemánu 30. b. 2009.
Jos don fárrejit eará gildii geassemánu 30. b. 2009 maŋŋil, de don leat girjejuvvon dan gieldda jienastuslohkui mas don fárrejit eret.
Jienasteaddjit guđet ásset olgoriikkas:
Jos don ásat olgoriikkas, muhto leat leamaš girjejuvvon Norgga ássin álbmotregistarii maŋimuš 10 jagi, de du automáhtalaččat čálihit dan gieldda jienastuslohkui masa don ledjet girjejuvvon ássin dallego don fárrejit Norggas olgoriikii.
Jos don it leat leamaš girjejuvvon Norgga ássin álbmotregistarii maŋimuš 10 jagi, de don fertet ohcat iežat čálihuvvot jienastuslohkui. Don ožat dainna lágiin ahte čálát iežat nama doavdnjekonvoluhttii mii geavahuvvo go olmmoš jienasta ovddalgihtii olgoriikkas. Jos don jienastat ovddalgihtii Norggas dahje it geavat namahuvvon doavdnjekonvoluhta, de fertet sierra ohcat beassat jienastuslohkui. Dan don sáhtát dahkat sierra reivviin dahje sierra skoviin maid deavddát. Ohcamis ferte leat du duođaštus ahte don ain leat Norgga stáhtalahttu. Du ohcan ferte ovdal dii. 21 čakčamánu 14. b. joavdat dan gieldda válgastivrii masa don maŋimusat ledjet čálihuvvon ássin álbmotregistarii.
