Leat go ráđđehusa karantena mearrádusat doaibman ulbmiliid mielde? Lea go dárbu njuolggadusaid rievdadit? Ođasmahttin-, hálddahus- ja girkoministtar Rigmor Aasrud áigu nammadit lávdegotti mii galgá guorahallagoahtit dáid gažaldagaid.
- Mii dárbbašat oktasaš ja nanu njuolggadusaid, maid eanaš politihkkárat dohkkehit. Karantena geavahus ja áššealmmuhangielddus lea vuolggahan olu váttis čuolmmaid, maid dát lávdegoddi galgá árvvoštallat, cealká ođasmahttinministtar Rigmor Aasrud.
Ráđđehusa karantena mearrádusaide gullet golbma iešguđetlágan njuolggadusa, maid ráđđehus ovddidii jagi 2005. Okta dáid njuolggadusain guoská politihkkáriidda (stáhtaráđit, stáhtačállit ja politihkalaš ráđđeaddit) geat álget eará virgái olggobealde stáhtahálddahusa. Nubbi njuolggadus guoská go molsu virggi politihkalaš dásis departemeantta dássái. Goalmmát fas guoská go ámmátvirgehasat ja bargit mannet eará virggiide mat eai gula stáhtahálddahussii.
Lávdegoddi galgá guorahallat buot dán golbma njuolggadusa, oažžun dihtii vuđolaš árvvoštallanvuođu.
Dál ii leat vuos mearriduvvon gii lávdegotti galgá jođihit. Lávdegotti miellahtuin gáibiduvvo áššáigullevaš juridihkalaš ja servodatdieđalaš duogáš. Dasa lassin gálgá lávdegottis leat politihkalaš ovddastus. Loahpalaš evttohus dasa mii guoská lávdegotti fápmudussii ja miellahtuide almmuhuvvo go lávdegoddi nammaduvvo stáhtaráđis.
Geahča maid:
