- Lihkku Loabát suohkanii

- Mun sávan lihku Loabát suohkanii go dál gullá sámegiela hálddašanguvlui. Hálddašanguovllu viiddideapmi lea mávssolaš sámegiela boahttevaš seailluheami várás, dadjá bargo- ja searvadahttinministtar Dag Terje Andersen.

Loabát suohkan lea goalmmat suohkan mii váldojuvvo fárrui sámegiela hálddašanguvlui 2006 rájes. Hálddašanguovllus leat dál ovcci suohkana njealji davimus fylkkas. Dáin suohkaniin leat sámegiella ja dárogiella ovttaárvosaš gielat.

- Ráđđehus dáhttu sámegiela geavahuvvot aktiivvalaččat, ja sámegiella galgá oidnot servodagas. Guovttegielalaš servodagat berrejit ásahuvvot go fal lea vejolaš, ja mun sávan ahte Loabát suohkan movttiidahttá eanet suohkaniid searvat sámegiela hálddašanguvlui, cealká stáhtaráđđi.

FÁKTÁ

• Jus suohkan galgá searvat hálddašanguvlui, de ferte suohkan dahkat mearrádusa dán hárrái.
• Dasto buktá Sámediggi cealkámuša suohkana mearrádussii, ja ášši sáddejuvvo Bargo- ja searvadahttindepartementii mii čáliha suohkana hálddašanguvlui.
• Golggotmánu 1.b. 2009 rájes gullá Loabát suohkan sámegiela hálddašanguvlui