Luondduhálddašandirektoráhta (LD) lea Birasgáhttendepartemeantta ráđđeaddi ja doaibmi fágaorgána luondduhálddašeamis. LD:s lea fágaidgaskasaš gelbbolašvuohta fágain ekologiija, eananbihtaidhálddašeapmi ja olgonastin, ja dat lea fáddaguovddáš ekologiija ja biologiija dieđuin mat leat dihtorii vuođđuduvvon.
Direktoráhtas leat ollu dieđut luonddudilis ja das lea fágalaš bagadallanváldi birasgáhttenossodagaide mat leat fylkkamánniid vuolde iežaset ovddasvástádussuorggis. DN bargá seailluhan dihte biologalaš girjáivuođa ja bargá maid dan ahte gáhttet ja nannet buohkaid geavahanrievtti.
Váldostrategiijat das ahte olahit mihttomeriid lea:
- sihkkarastit ahte lea girjáivuohta Norgga luonddus ja eatnamiin, ja dat galgá maid bargat dan ala ahte doalahit lunddolaš buvttadannávccaid
- fuolahit dan ahte guhkitáigge luondduriggodagaid geavaheapmi biddjo vuođđun areala- ja čázádatplánemiid ja luonddulihkadeami plánaid oktavuođas
- ovddidit vejolašvuođaid das ahte atnit luonddu olgonastimii, oahpahussii ja láddjemii
- ohcat ja gaskkustit dieđuid mat galget leat vuođđun aktiivvalaš ja eastadeaddji luondduhálddašeapmái
Stáda Luonddubearráigeahču rolla ja barggut:
Stáda luonddubearráigeahčču (SLB) lea vuođđuduvvon stáda luonddubearráigeahččolága mielde mii bođii 21.6.1996:s ja dat galgá buot stáda bearráigeahččobarggu fátmmastit. SLB galgá ráhkadit ipmárdusa ja olbmuid oččodit gutnis atnit daid njuolggadusaid mat leat dán suorggis. Ja dat galgá maid eastadit luondduillásteami. Váldobarggut gártet leat diehtojuohkin ja bagadallan, dasa lassin galgá vel earret eará leat dárkkisteapmi, registreren, duođašteapmi, fuolaheapmi ja doaimmaheapmi.
Deattuhuvvo hirbmadit dat ahte ásahit buori ovttasbarggu eará luonddubearráigeahču oasálasttiiguin. Dalle lea maid deaŧálaš ovttastahttit barggu politiijaiguin go lea sáhka dárkkistanbargguin. Našuvnnalaš jođiheapmi lea čadnon Luondduhálddašan direktoráhtii. Ja eanemus barggut galget doaimmahuvvot báikkálaččat dain guovlluin gos lea eanemus dárbu nannet bearráigeahču.
