Maid don oaivvildat sámepolitihka birra?

- Ráđđehus áigu ovddidit viiddes stuorradiggedieđáhusa sámepolitihka prinsihpaid birra čakčat. Dan oktavuođas mii dárbbašit evttohusaid, árvvoštallamiid ja oainnuid sámepolitihkalaš áššiid birra nu ollugiin go vejolaš sihke sámi birrasiin ja sámi birrasiid olggobealde, dadjá stáhtaráđđi Bjarne Håkon Hanssen.

Álbmotčoahkkimis Kárášjogas odne almmuha son neahttauskkádaga www.samepolitikken.no álboga oaiviliid ja evttohusaid várás.

Dan lassin ahte neahttauskkádagas beassá buktit ovdan oaiviliid sámepolitihka birra, de leat das maiddái dieđut dálá sámepolitihka ja dan duogáža birra, oanehaččat stuorradiggedieđáhusa fáttáid birra ja gažaldagat ja vástádusat sámepolitihkkii. Stáhtaráđđi áigu maiddái bovdet neahttačoahkkimii dán siidui hui fargga.

- Sávan ahte neahttauskkádat geavahuvvo árjjalaččat! dadjá Bjarne Håkon Hanssen.