Máilmmi álgoálbmotbeaivi

Máilmmi álgoálbmotbeaivi čalmmustahttá máilmmi álgoálbmogiid, ja dat lea solidaritehta ja álgoálbmogiid oktiigullevašvuođa beaivi. Odne čalmmustahttojuvvo ON riikkaidgaskasaš álgoálbmotbeaivi golbmanuppoelogát gearddi.

- Riikkaidgaskasaš álgoálbmotbeaivvi háliidan čájehit beroštumi álgoálbmogiid positiiva váikkuhussii kultuvrralaš šláddjiivuhtii máilmmis. Várra erenoamážit danne go ollu álgoálbmogat ellet hirpmus váttis diliin, ja dávjá dát joavkkut ožžot hui negatiiva fuomášumi máilmmis duolbmama, doarrádallama ja heađi geažil, dadjá stáhtaráđđi Bjarne Håkon Hanssen.

- Norggas leat sámit dohkkehuvvon álgoálbmogin, ja iešguđet sámi ásahusat barget ovttas eará máilmmi álgoálbmogiiguin máŋgga suorggis. Okta ovdamearka lea álgoálbmotfestivála Riddu Riđđu mii lea mielde váikkuheamen sihke sámi kultuvrii ja eará davvi álgoálbmogiid kultuvrraide, dadjá stáhtaráđđi.

- Norggas lea leamaš aktiiva rolla oaččohit áigálii ON-julggaštusa álgoálbmogiid vuoigatvuođaid birra, ja Norga háliida boahtteáiggi ge oassálastit bargui man ulbmil lea buoridit álgoálbmogiid dilálašvuođaid máilmmis, dadjá Bjarne Håkon Hanssen. 

ON váldočoahkkin ásahii máilmmi álgoálbmotbeaivvi 1994, ja máilmmi álgoálbmotbeaivvi beaivemearri válljeduvvui dan beaivvi vuođul go ON bargojoavku máilmmi álgoálbmogiid várás doalai iežas vuosttaš čoahkkima borgemánu 9. beaivvi 1982. ON váldodálus New Yorkkas čalmmustuvvo beaivi meanuiguin maid maŋŋil lea paneladigaštallan álgoálbmotnuoraiguin giela birra.

Ráđđehusa bealis lea davviguovlluid álgoálbmotolli ovttastuvvon Davviguovlostrategiijii, dan lassin ahte mii bargat ovttas eará riikkaid ráđđehusaiguin álgoálbmotáššiiguin ge sihke Barentsovttasbarggu, Árktalaš Ráđi, Eurohparáđi ja ON bistevaš álgoálbmotfora bokte.