Muitte ahte dus FERTE leat legitimašuvdna jienasteapmái!
Válgabeaivi lea čakčamánu 14. b. 2009. Válgalanjat rahppojuvvojit 205 gielddas juo sotnabeaivvi čakčamánu 13. b. Geahča visogova mas oainnát main gielddain válga čađahuvvo ovtta beaivvis ja main gielddain dat čađahuvvo guovtte beaivvis.
Válgabeaivvi čakčamánu 14. b. (ja 13. b. dain gielddain main válga bistá guokte beaivvi) don fertet jienastit dan gielddas man jienastuslohkui don leat čáli¬huvvon. Don leat dan gieldda jienastuslohkui čálihuvvon man álbmotregistarii don ledjet girjejuvvon ássin geassemánu 30. b. válgajagi.
Gielda dieđiha válgalanja mas don sáhtát jienastit ja goas dat lea rabas. Muitte dattetge ahte don sáhtát jienastit man fal válgalanjas ihkinassii gielddas.
Don fertet legitimašuvnna váldit mielddát! Don it dárbbaš válgakoartta go jienastat, muhto go dat lea dus mielde, de dat álkkásmahttá válgadoaimmahasaid barggu ja du jienasteapmi ii ádján nu guhká.
Dárbbašatgo rávvaga dahje veahki?
Jos don dárbbašat rávvaga dahje veahki válgalanjas, de don sáhtát das váldit oktavuođa muhtun válgadoaimmahassii.
Gielddat leat rievtti mielde geatnegasat lágidit jienasteami dakkár lanjaide maidda buot jienasteaddjit besset veahki haga. Jos dattetge muhtun válgalatnja lea dakkár ahte lámis jienasteaddji ii beasa sisa, de dat jienasteaddji sáhttá jienastit dasttá olggobealde dan válgalanja. Dalle guokte válgadoaimmahasa galget boahtit olggos ja dárbbu mielde veahkehit jienasteaddji ja vuostáiváldit su jienastaga.
Leatgo fárren geassemánu 30. b. 2009 maŋŋil?
Jos don leat fárren geassemánu 30. b. maŋŋil, de don leat girjejuvvon dan gieldda jienastuslohkui mas don leat fárren eret, vaikko vel leatge dieđihan iežat fárrema. Don leat dan gieldda jienastuslogus man álbmotregistarii don ledjet čálihuvvon ássin geassemánu 30. b. 2009.
Dus lea jienastanvuoigatvuohta ja jienastat dan gielddas man jienastuslohkui don leat girjejuvvon. Jos don doppe it sáhte jienastit válgabeaivvi, de don sáhtát jienastit ovddalgihtii dan gielddas mas don dalle leat. Du jienastat sáddejuvvo du ruovttugildii.
Ná don jienastat válgabeaivvi
Don it galgga geavahit jienastanlihppokonvoluhta válgabeaivvi. Dan sadjái don galggat máhccut jienastanlihpu ja dan galgá válgadoaimmahas steampalastit ovdalgo don dan bijat válgaurdnii.
Ná don galggat bargat go jienastat stuorradiggeválggas:
| 1. Váldde dan jienastanlihpu maid don háliidat geavahit. |
|
 |
| 2. Rievdat jienastanlihpu jos don dan háliidat (geahča rávvagiid). |
|
 |
| 3. Máhcas jienastanlihpu nu ahte dan bellodatnamma šaddá siskkobeallai ja dan steampalastinsadji olggobeallai! Dalle ii oktage sáhte oaidnit maid don jienastat. Don it galgga geavahit reivegokčasa dahje eará olggoža dannego jienastanlihppu galgá steampalastojuvvot. |
|
 |
| 4. Mana válgadoaimmahasa lusa vai son sáhttá steampalastit du jienastanlihpu olggobeallai. Jienastanlihppu ii dohkkehuvvo jos das váilu steamppal. |
|
 |
| 5. Cokka steampalastojuvvon jienastanlihpu jienastanurdnii. |
|
 |
