Njunuščoahkkin čielga giela birra

Annetta Cheek, gii lea johttáhan presideanta Obama čielga giela lága, deaivvadii ođasmahttinministtar Rigmor Aasrudiin mannan vahkus.
 
- Mii eat galgga vajálduhttit, ahte ássithan lohket min reivviid ja sin várás mii ráhkadit skoviid, dajai ođasmahttin-, hálddahus- ja girkoministtar Aasrud. Ollugat ovála beavddi guoras nannejedje cealkámuša nivkalemiin. Beavdegurrii ledje čoahkkanan NBČ, Vearrodirektoráhta,  Olgoriikkalaččaid direktoráhta, Stáhta penšuvdnakássa ja stáhtaráđi iežas Ođasmahttin- hálddahus- ja girkodepartemeantta direktevrrat ja gulahallandirektevrrat, geat mielas guldaledje rávvagiid, maid čielga giela eadnin gohčoduvvon Annetta Cheek juogadii.
 
”Čielga giella stáhtas” lea Rigmor Aasruda prošeavtta namma. Láhkagiella lea okta ođđa áŋgiruššansurggiin.
–  Lágaid ja láhkaásahusaid eahpečielga ja lossa giella leavvá dađi bahábut reivviide ja skoviide, maiguin mii riikkaássin fertet birgehallat, ođasmahttinministtar dadjalii.
 
- Menddo ollugat navdet, ahte sii fertejit čállit mohkkájit vai sii orrot nu jierbmái go vejolaš, muhto dat ii dieđusge doala deaivása, čilgii áššiin áŋgiruššan Annetta Cheek. Son dáistalii máŋga jagi čielga giela lága ovdii, ja golggotmánus 2010 dat bođii fápmui.

Rigmor Aasrud giittii Annetta Cheek go son bođii movttiidahttit sin bargat čielga giela ovdii.
- Mun lean diŋgon alccesan steampala, mas čuožžu ”Dárbbašuvvo čielga giella”, stáhtaráđđi muitalii.
- Dál áiggun steampalastit dokumeanttaid, mat leat menddo eahpečielgasat ja sáddet daid ruovttoluotta daidda, geat leat čállán dokumeantta, ja gáibidit čielgasut giela.

Govva: Ođasmahttinministtar Rigmor Aasrud ovttas Annetta Cheekain, gii lea johttáhan presideanta Obama čielga giela lága. Govva: OHG.