18.06.2007 - 3. jahkegeardi
____________________________________________________________________________________________
- Ráđđehus áigu ovddidit viiddes stuorradiggedieđáhusa sámepolitihka prinsihpaid birra čakčat. Dan oktavuođas mii dárbbašit evttohusaid, árvvoštallamiid ja oainnuid sámepolitihkalaš áššiid birra nu ollugiin go vejolaš sihke sámi birrasiin ja sámi birrasiid olggobealde, dadjá stáhtaráđđi Bjarne Håkon Hanssen.
Dát lea duogážin dasa go stáhtaráđđi álbmotčoahkkimis Kárášjogas cuoŋománus almmuhii neahttabáikki www.samepolitikken.no mii lea báiki gos olbmot sáhttet buktit oaiviliid ja árvalusaid.
Dan lassin ahte neahttauskkádagas beassá buktit ovdan oaiviliid sámepolitihka birra, de leat das maiddái dieđut dálá sámepolitihka ja dan duogáža birra, oanehaččat stuorradiggedieđáhusa fáttáid birra ja gažaldagat ja vástádusat sámepolitihkkii.
- Sávan ahte neahttauskkádat geavahuvvo árjjalaččat! dadjá Bjarne Håkon Hanssen.
____________________________________________________________________________________________
Sámepolitihka stuorradiggedieđáhusa barggu oktavuođas leat iešguđet departemeanttaid stáhtačállit ja ámmátdoaimmahagat mátkkoštan sihke Finnmárkkus, Romssas ja Nordlánddas ja Davvi-Trøndelágas. Mátkkiiguin lea ulbmil leamašan muitalit ráđđehusa sámepolitihka barggu birra, ja oažžut árvalusaid sámepolitihka viidáset bargui.
”Gierdomátki” álggii cuoŋománus go lágiduvvui golmmabeaivásaš bussemátki Romssas Finnmárkui. Guoktenuppelohkái departemeantta stáhtačállit ja ámmátdoaimmahagat ožžo dieđuid ja árvalusaid guovllu iešguđet sámi birrasiin. Stáhtačálli Bjarne Håkon Hanssen oassálasttii, ja lei maid fárus álbmotčoahkkimis Kárášjogas.
Miessemánus mátkkoštedje stáhtačálli Berit Oskal Eira ja golbma departemeantta ámmátdoaimmahaga Snoasai ja Tronesii Davvi-Trøndelágas. Dáppe bovdejedje čoahkkimii fylkkagieldda, suohkaniid ja guovllu gullevaš ásahusaid. Ásahusat – mat Davvi-Trøndelágas ja lullisámiguovllus barget ollu iešguđetlágan sámepolitihkalaš bargguid– muitaledje doaimmaideaset birra ja bukte sámepolitihka bargui ollu buriid árvalusaid.
Maŋemussii fitne Sis-Romssás ja Davit Nordlánddas. Geassemánu álggus lei guovtti beaivásaš mátki ollu dáhpáhusaiguin mas ollu suohkanat ja sámi ásahusat ožžo viđa departemeantta stáhtačálli ja ámmátdoaimmahaga guossin.
Loga mátkkiid birra www.samepolitikken.no
Álbmotčoahkkimis Kárášjogas. Gurutbealde čoahkkinjođiheaddi Trygve Solbakk, sámediggeáirras Egil Olli, sámediggepresideanta Aili Keskitalo, Kultur- ja girkodepartemeantta stáhtačálli Randi Løvland ja stáhtačálli Bjarne Håkon Hanssen. Govva: Kjell H. Sæther.
____________________________________________________________________________________________
ON eamiálbmotáššiid Bistevaš foruma guđat sešuvdna lágiduvvui New Yorkas áigodagas miessemánu 14.-25.b. Norgga ON ambassaádevra, Johan L. Løvald doalai Norgga sáhkavuoru forumii distaga miessemánu 14.b.
Norga lea aktiivvalaččat leamaš fárus ásaheame Eamiálbmotáššiid bistevaš foruma mii lágiduvvo jahkásaččat New Yorkas. Foruma lea vuosttažettiin ja ovddemusat ráđđeaddi ja ovttastahtti orgána ON eamiálbmotgažaldagaide, ja das leat 16 miellahtu. Gávccis sis leat eamiálbmotáirasa ja gávccis leat ráđđehusat nammadan. Foruma ásahemiin leat eamiálbmogat ožžon institušuvnna ja deaivvadanbáikki ON-vuogádagas gos sáhttet ovddidit vuoigatvuođaideaset.
Foruma vuosttaš sešuvdna lágiduvvui 2002:s gos Ole Henrik Magga válljejuvvui ovdaolmmožin. Su maŋis válljejuvvui Victoria Tauli-Corpuz Filippiinnain gii dál jođiha foruma.
Loga sáhkavuoru dás (eŋgelasgiella)
Eamiálbmotáššiid bistevaš foruma birra
__________________________________________________________________________________________
Bargo- ja searvadahttinministtar Bjarne Håkon Hanssen ja sámediggepresideanta Aili Keskitalo oaččuiga cuoŋománu 27.b. bargojoavkkus raportta Sámedikki formálalaš sajádaga ja bušeahttabargovugiid birra.
Raportta lea bargojoavku ráhkadan mas leat Bargo- ja searvadahttindepartemeantta, Justisdepartemeantta ja Sámedikki áirasat. Bargo- ja searvadahttinministtar ja Sámediggepresideanta leigga ovttaoaivilis dasa ahte bargojoavku ceggejuvvui.
Raporttas evttohuvvo ahte Sámediggi sámelága rievdadusaiguin formálalaččat oažžu eambbo iešráđálaš sajádaga ráđđehusa ektui go dan mii otná dilli lea. Evttohus mielddisbuktá ovddemusat ahte duohta dilálašvuohta formaliserejuvvo. Viidáset evttohuvvo ahte ásahuvvojit bušeahttabargovuogit maiguin mearrida jahkásaš bajitdási ekonomalaš rámmaid Sámediggái ja eará sámi doaimmaide.
Bargui leat vuođđun álbmotrievttálaš geatnegasvuođat ja dáhttu ahte nannet sámi servodaga demokráhtalaš proseassaid. Dasa lassin leamašan áigumuš nannet ráđđehusa ja Sámedikki ovttasdoaibmama ja beaktilahttit ráđđehusa barggu sámi áššiiguin. Bargojoavkkus leat leamašan Sámedikki, Justis- ja politiijadepartemeantta ja Bargo- ja searvadahttindepartemeantta miellahtut.
Ráđđehus ja Sámediggi áigot čađahit konsultašuvnnaid gaskaneaset daid doaibmabijuid birra, mat evttohuvvojit raporttas, ja ášši digaštallojuvvo stuorradiggedieđáhussas sámepolitihka birra mii almmuhuvvo 2007 čavčča.
Sámediggi áigu meannudit ášši čakčamánu dievasčoahkkimis.
Bargojoavkku raporta Sámedikki formálalaš sajádaga ja bušeahttabargovugiid birra
__________________________________________________________________________________________
Ođđasat sámepolitikas birra
Almmustahtii Bargo- ja searvadahttindepartementa, Sámi- ja minoritehtapolitihkalaš ossodat.
Ovddasvástideaddji doaimmaheaddji: Petter Drefvelin
Doaimmaheaddji: Hanne Lauveng
E-poasta: 
Bargo- ja searvadahttindepartementa
Poastačujuhus 8019 Dep, 0030 Oslo
