ON-mánáidkonvenšuvdna
ON dievasčoahkkin dohkkehii skábmamánu 20.b.1989:s ON konvenšuvnna mánáid vuoigatvuođaid birra, ja Norga dohkkehii dan ođđajagimánu 8.b.1991:s. Mánáidkonvenšuvdna ovttastahttojuvvui Norgga láhkii golggotmánu 1.b. 2003:s.
Mánáidkonvenšuvdna addá mánáide ja vuollel 18 jahkásaš nuoraide earenoamáš olmmošvuoigatvuođasuodjaleami. Konvenšuvnna sáhttá juohkit njealji váldosuorgái. Buot mánáin lea vuoigatvuohta: eallimii ja dearvvašvuhtii; skuvlavázzimii ja ovdáneapmái; oassálastimii ja mieldeváikkuheapmái ja fuolahussii ja suodjaleapmái. Buot doaimmain mánáid hárrái galgá leat vuođđun das mii mánnái lea buoremussan. Buot almmolaš orgánat ja bargit leat geatnegahtton ollašuhttit ja árvvus atnit mánáid vuoigatvuođaid nu go ovdanbohtet konvenšuvnnas.
