Svalbárdda mearrajohtalusa oadjebasvuođa nannen
Arvat doaibmabijut leat juo biddjojuvvon johtui ja galget biddjojuvvot johtui vai sihkkarastet mearrajohtalusa oadjebasvuođa Norgga fávlliin. Ráđđehusa davveguovlostrategiijii gullevaš deaŧalaš oassi lea Svalbárdda biras čázádaga johtalusa oadjebasvuohta. Ráđđehus dainna lágiin áigu dievvasii buoridit davveguovlluid mearrajohatalusa oadjebasvuođa, ii duššefal Norgga fávlliin, muhto maiddái Svalbárddage.
Svalbárdda birrasaš skiipajohtalus buktá sierra hástalusaid sihke birrasa dáfus, olbmuid oadjebasvuođa dáfus ja lassáneaddji lustaskiipamátkkiid dáfus. Ráđđehus danne dáhttu ásahit buriid juridihkalaš rámaid ja ortnegiid, mat buoridit Svalbárdda biras čázádagaid johtti olbmuid oadjebasvuođa.
Davveguovlostrategiijas áigumušaid mielde ráđđehus lea mearridan ahte Svalbárddas galgá leat bággu geavahit oahpisteaddji. Odne olbmot geavahit iežaset háliidusa mielde oahpisteddjii, iige leat miige formála gáibádusaid das, makkár oahpisteaddji galgá leat. Dál galgá ortnet leat bákkolaš, nu ahte dárbbašlaš máhttu gáibiduvvo sis guđet johtet čázádagaid mat dádjadeami dáfus leat váddásat.
Ráđđehus áigu álggahit hámman- ja čázádatlága dakkár hámis mii heive Svalbárdii. Nannamis dat lea Guolástus- ja riddodepartemeanta mii, Riddoásahusa bokte, doaibmá maritiibma infrastruktuvrra ja bálvalusaid vásttolažžan. Deaŧalaš lea ahte Svalbárdda biras čázádagaide lea ollisvuohta ee. čázádatreguleremiid, čuovgatoartnaid ja mearramearkkaid dáfus. Hámman- ja čázádatláhka sáhttá maid vejolaččat siskkildit mearrádusaid mat gildet/ráddjejit borjjastemiid dakkár guovlluin main lea váttis johtit.
