Veaháš rievdadeames oahpes cealkámuša: Boahtteáigi ii leat dušše min ovddabealde, dat lea dás dál juo. Dan vásihii ođasmahttinministtar Rigmor Aasrud go son gaskavahku beasai gullat ja oahppat Nationála ovttasdoaibmaguovddáža ja telemedisiinna doaimma birra Romssas.
Dá leat álggahuvvon prošeavttat mat, jus dat šaddet bistevažžan, sakka buoridivčče dálkkodanfálaldaga, earenoamážiid guovlluin gos leat guhkes gaskkat ja olbmot ásset bieđgguid. Geavaheames govdafierpmádaga ja interneahta sáhttá dagahit vejolažžan dávjjibut fállat spesialistaveahki go ovdal.
Liikespesialista Romssas sáhttá álkes web-kamera ja pc bakte veahkehit dálkkodeames mánáža Honnesvágis liikeeksemain. Fáhkkadálkkaslaš spesialisttat guovddášbuohcciviesus sáhttet čuovvut ja rávvet go johtolagas duođalaš roasmmohuvvon olmmoš dálkkoduvvo guovllu eará báikkálaš buohcciviesus. Pasieanta guhte jeavddalaččat dárbbaša monnendialiisa sáhttá dan oažžut ruovttuguovllus dan sadjái go golahit áiggi ja návccaid mátkkošteames stuorit buohccivissui.
Dákkár čoavddus ii dušše mearkkaš ahte oažžu jođáneappot ja buoret veahki, dat maiddái dagaha ahte jahkásaččat seastá ollu ruđaid. 1,4 miljárdda ruvdno dál atno máksimis Nordlándda, Romssa ja Finnmárkku pasieanttaid mátkegoluid.
Aasrud jearahii movt son sáhtášii bargat vai dáid čovdosiid rievdadit prošeaktadásis bistevaš dássái. Son oaččui čielga dieđuid bargiin, ja lohpidii daid váldit mielde go ráđđehus bargá viidáset dáid áššiiguin.
Govas: Ođasmahttinministtar Rigmor Aasrud ja NST guovddáža hoavda Toralf Hasvold.
