Álgoálbmogiid olmmošvuoigatvuođat
Álgoálbmogiid vuoigatvuođaid buorideapmi riikkaidgaskasaš dásis lea Norgga olmmošvuoigatvuođapolitihka ovddimussii vuoruhuvvon ášši. Viidát máilmmis álgoálbmogat gullet daidda joavkkuid searvái mat leat rašimuš dilis ekonomalaččat ja politihkalaččat. Olgoriikadepartemeanta doaibmá dán suorggis ovttasráđiid Sámedikkiin. Dehálaš oassi dan barggus maid Norga čađaha álgoálbmotvuoigatvuođaid buorideapmái, dáhpáhuvvá ON:a rámaid siskkobealde. Norggas lei ee. dehálaš rolla go ON:a julggaštus álgoálbmogiid vuoigatvuođaid birra válmmaštuvvui.
Norggas leat sierra láidagat bargguide maid čađaha ovddideaddji ovttasbarggus álgoálbmogiiguin. Váldoáššin lea vuoruhuvvon veahkehit álgoálbmotjoavkkuid buorebut ovddidit iežaset beroštumiid báikkálaš ja riikkalaš eiseválddiid luhtte.
Álgoálbmotperspektiiva lea guovdil davviguovlluid ovttasbarggus.