Veahkaváldimat lagas gaskavuođain lea duođalaš servodatváttisvuohta. Norgga lága mielde ii leat makkárge lágan veahkaváldin lobálaš ja dat rihkku vuođđo olmmošvuoigatvuođaid, ja das leat stuora váikkuhusat dasa gii dan vásiha. Veahkaváldin lagas gaskavuođain ii dohkkehuvvo, ja dan galgá hehttet ja vuosttildit.
2007 skábmamánus almmuhuvvui Doaibmaplána veahkaváldimiid vuostá lagas gaskavuođain (2008 – 2011) “Vendepunkt” (”Rievdadus”). Plánas leat 50 konkrehta doaibmabiju dákkár váldovuoruhansurggiin:
- Galgá sihkkarastit veahki ja suddjema sidjiide geat lagas gaskavuođain vásihit veahkaváldimiid.
- Dikšunfálaldat veahkaváldiide nannejuvvo nu ahte sii heitet veahkaváldindaguiguin.
- Veahkaváldiin láhčit ságastallamiid sidjiide geat lagas gaskavuođain vásihit veahkaváldimiid (restorative justice)
- Veahkkeapparáhtas galgá nannejuvvot ovttasbargogelbbolašvuohta ja máhtolašvuohta
- Dutkan ja ovdánahttinbargu galgá biddjojuvvot johtui ja jotkojuvvot.
- Veahkaváldimat lagas gaskavuođain galget dahkkojuvvot eambbo oainnusin.
- Miellaguottuid rievdademiin galgá hehttet veahkaváldimiid lagas gaskavuođain.
Justisdepartemeanttas lea ovttastahttin ovddasvástádus doaibmaplána čađaheapmái. Čađaheapmi dahkkojuvvo ovttas Mánáid-, dásseárvo- ja searvadahttindepartemeanttain, Dearvvašvuođa- ja fuolahusdepartemeanttain, Bargodepartemeanttain ja Máhttodepartemeanttain. Justisdepartemeantta ruovttusiidduin gávdná bajilgova das man guhkás doaibmaplánabargguin leat ollen.
