Oahppit sáhttet iešguđetlágan prográmmaiguin oalle álkit ráhkadit čáppa digitála ovdanbidjamiid. Bargu heive buot agiide. Dási ja hivvodaga sáhttá heivehit ceahkkái ja ovttaskas oahppái.
Oahpaheaddji ferte ieš máhttit geavahit dábálaččamus bargovugiid ovdal go bargagoahtá ohppiiguin.
Jus oahppit leat apmasat bargovuohkái, de berrejit álggos ráhkadit ovttas govvamuitalusaža. Oahpaheaddji čájeha, čilge ja bagadallá. Dasto sáhttet oahppit iehčaneaset geahččaladdat. Govvamuitalusaid sáhttá dađistaga ráhkadit guhkkin, máŋggageardánin ja dasa sáhttá bidjat fágalaš sisdoalu.
NB! Muitte ohppiiguin ságastallat govaid ja gálduid geavaheami birra.
Reaiddut
- pc mas lea jietnakoarta
- mikrofovdna
- digitála govvenapparáhtta
- govat
- prográmma mainna sáhttá ovttastahttit jienaid, govaid, videoid ja teavsttaid. (Dákkár prográmma lea dávjá juo dihtoris, ja gávdnojit maid nuvttáprográmmat.)
- govvaredigerenprográmma. (Jus ii gávdno juo dihtoris govvaredigerenprográmma, de gávdnojit máŋga nuvttáprográmma maid sáhttá dihtorii viežžat.)
Bargovuohki
Oahppit čállet teavstta ja ráhkadit dasa govaid, dahje sii čállet teavstta govaide. Sii bidjet sisa jienaid, lohket sisa teavstta ja/dahje bidjat dasa musihka. Teavsttat sáhttet leat máidnasat, divttat, lávlagat dahje iežaset muitalusat.
Govvamuitalusaid sáhttá geavahit dalle go oahppit áigot ovdanbuktit juoidá earáide.
Bargojohtu
- Oahpaheaddji mearrida, dahje oahppit mearridit govvamuitalusa šáŋŋera ja fáttá.
- Oahppit govvejit, sárgot dahje ohcet govaid interneahtas. Oahpaheaddji sáhttá maid addit sidjiide muhtin govaid maid gaskkas válljedit.
- Oahppit ráhkadit vuosttaš ja maŋemus siiddu. Dán sáhttá dahkat alcces prográmmii, sárgunprográmmas dahje ovdanbuktinprográmmas. Jus geavahit sárgunprográmma dahje ovdanbuktinprográmma, de fertejit vurket fiillaid govvaformáhttii dego jpg dahje jpeg. Ovdasiiddus sáhttá leat omd. girječálli namma. Das sáhttá maid govva mii govvida fáttá dahje buktá beroštumi fáddái.
- Maŋemus siiddus galgá leat govvamuitalusa ráhkadeaddji namma. Das galget maid leat gáldočujuhusat. Oahppit fertejit muitit sihke musihka, teavstta ja govaid.
- Oahppit čállet dahje bidjet sisa teavsttaid ja bidjet govaid. Sii lohket teavstta báddái, bidjet jiena ala ja bidjet sisa musihka. Govaid heivehit vuohkkasit oktii.
- Loahpas ráhkadit oahppit waw-fiilla.
- Oahppit čájehit iežaset govvamuitalusa guhtet guimmiidasaset. Sii sáhttet maid čájehit daid váhnmemiidda geat fitnet luohkás.
Oahpaheaddji árvvoštallá gárvves govvamuitalusa. Jus oahppit geavahit govvámuitalusa oahppamii, de ferte maid fágalaš sisdoallu árvvoštallojuvvot. Govvamuitalus sáhttá adnot árvvoštallat oahppi riektačállin- ja sátneriggodat-ovdáneami sámegielfágas.
Vuollelis lea skovvi man sáhttá atnit dađistaga-árvvoštallamii. Válljejuvvon mihtut galget govvidit barggu ovdáneami. Dás sáhttá oahpaheaddji čuovvut oahppi ovdáneami. Oahppit sáhttet maid geavahit skovi go árvvoštallet iežaset ja guhtet guoimmiset.
Árvvoštallan
| Oahppi máhttá |
|
| govvet digitála govvenapparáhtain |
|
| sirdit govaid govvenapparáhtas dihtorii |
|
| gávdnat fas iežas govaid dihtoris |
|
| čállit sisa teavsttaid |
|
| báddet jienaid digitála reaidduiguin |
|
| bidjat sisa teavstta ja govaid |
|
| plánet govvamuitalusa mas leat govat, čállojuvvon teavsttat, jienat ja musihkka |
|
| ráhkadit govvamuitalusa mas leat govat, čállojuvvon teavsttat, jienat ja musihkka, ja bidjat daid vuohkkasit oktii |
|
| dokumenteret fuomášumiid dahje bargoproseassa |
|
| ovdanbuktit fágalaš barggu |
|