Sámegiella nubbingiellan, sámegiella 2: bagadeaddji nationála gelbbolašvuođa olahusa dovdomearkkat loahppaárvvoštallamii – dássi 6 Gelbbolašvuođa olahusa dovdomearkkat válddahit gelbbolašvuođa kvalitehta fágas. Dovdomearkkat leat hábmejuvvon fága váldoosiid rastá ja oahppoplána gelbbolašvuođamihttomeriid vuođul. Dan dihte ferte dovdomearkkaid geavahit ovttas oahppoplánain. Gelbbolašvuođa olahusa dovdomearkkat leat jurddašuvvon veahkkin go galgá árvvoštallat oahppi ollislaš gelbbolašvuođa fágas. Loahppaárvosátni galgá albmanahttit dan gelbbolašvuođa mii oahppis lea fágas go oahpahus loahpahuvvo. Dovdomearkkat leat hábmejuvvon dainna lágiin ahte galgá sáhttit heivehit ja konkretiseret. Sáhtát lohkat eambbo árvvoštallama birra Oahpahusdirektoráhta siidduin: www.udir.no/Vurdering/Standpunktvurdering-i-fag/ Dovdomearkkat leat juhkkojuvvon guovtti oassái: sámegiella nubbingiellan njálmmálaš ja sámegiella nubbingiellan čálalaš. Váldooassi giella, kultuvra ja girjjálašvuohta lea mielde goappaš osiin. Dovdomearkkat leat hábmejuvvon golmma dásis. Tabealla ferte lohkat horisontálalaččat oaidnin dihte progrešuvnna daid iešguđet dásiid gaskka ja vertikálalaččat oaidnin dihte oahppi ollislaš gelbbolašvuođa. SÁMEGIELLA NUBBINGIELLAN - DÁSSI 6 - NJÁLMMÁLAŠ Árvosátni 2 Oahppi... - geavaha sátneriggodaga mii muhtin muddui gokčá dárbbuid albmanahttit vásáhusaid, dovdduid, muosáhusaid, máhtu ja iežas oaiviliid - ovttasdoaibmá muhtin muddui vai ipmirda ja áddehallá ságastallamiin ja ovdanbuktimiin - guldala ja bájuha sisdoalu konkrehtalaččat, buktá ovdamearkkaid álkis vugiin muhtin beliide teavsttain ja albmanahttá oaiviliiddis álkis vugiin - ovdanbuktá muhtin fágaáššiid ipmirdahtti vugiin ja máhttá geavahit muhtin ovdanbuktinreaidduid Árvosánit 3 ja 4 Oahppi... - geavaha sátneriggodaga mii buori muddui gokčá dárbbuid albmanahttit vásáhusaid, dovdduid, muosáhusaid, máhtu ja iežas oaiviliid - ovttasdoaibmá oalle bures vai ipmirda ja áddehallá ságastallamiin ja ovdanbuktimiin - guldala ja ipmirda muhtin osiid guhkit teavsttaid sisdoalus ja albmanahttá oaiviliiddis muhtin beliin teavsttain - ovdanbuktá fágalaš fáttáid oalle buriin vugiin ja máhttá geavahit digitála reaidduid ja mediaid muhtin muddui heivehuvvon ulbmilii Árvosánit 5 ja 6 Oahppi... - geavaha sátneriggodaga albmanahttit vásáhusaid, dovdduid, muosáhusaid, máhtu ja iežas oaiviliid - ovttasdoaibmá bures vai ipmirda ja áddehallá ságastallamiin ja ovdanbuktimiin - guldala ja ipmirda váldosisdoalu guhkit teavsttain ja reflektere iešguđet beliid teavsttain - ovdanbuktá iešguđetlágan fágalaš fáttáid ulbmillaččat ja geavaha digitála reaidduid ja mediaid ulbmillaččat SÁMEGIELLA NUBBINGIELLA - DÁSSI 6 - ČÁLALAŠ Árvosátni 2 Oahppi... - lohká ja bájuha juoidá váldosisdoalus dahje eaŋkilosiid teavsttas - lohká ja reflektere muhtin beliid válljejuvvon šáŋrain - čállá teavsttaid álkis sátneriggodagain ja cealkkahuksemiin ja hálddaša muhtin muddui vuođđogrammatihka - čállá iešguđetlágan teakstašlájaid álkis váikkuhangaskaomiiguin ja heiveha teavsttaid muhtin muddui teavstta ulbmiliidda - geavaha álkis gálduid iežas teavsttaid čálidettiin ja almmuha gálduid Árvosánit 3 ja 4 Oahppi... - lohká ja referere teavstta váldosisdoalu - lohká ja reflektere sisdoalu ja hámi muhtin šáŋrain - čállá teavsttaid heivvolaš sátneriggodagain ja álkis sátnehuksemiin ja hálddaša buori muddui vuođđogrammatihka - čállá iešguđetlágan teakstašlájaid muhtin váikkuhangaskaomiiguin ja heiveha teavsttaid teavstta ulbmiliidda - geavaha buori muddui áššáiguoskevaš gálduid čálidettiin iežas teavsttaid ja almmuha gálduid Árvosánit 5 ja 6 Oahppi... - lohká, referere ja čoahkkáigeassá teavstta váldosisdoalu - lohká ja reflektere sisdoalu ja hámi iešguđetlágan šáŋrain - čállá teavsttaid mas molssoda sátneválljema ja cealkkahuksema, ja hálddaša vuođđogrammatihka - čállá iešguđetlágan teakstašlájaid máŋggalágan váikkuhangaskaomiiguin heivehuvvon teavsttaid ulbmilii - geavaha áššáiguoskevaš gálduid barggadettiin iežas teavsttaiguin diđolaččat ja almmuha gálduid dainna lágiin ahte lohkki sáhttá maŋŋil gávdnat daid