Ovttasdoaibmaođastus

Buoret ovttasdoaibman ássiid buoremussan

Ođastusa ulbmil lea bargat eanet ovddalgihtii eastademiin, dálkkodit árat ja buorebut doaibmat ovttas. Divššohasat ja geavaheaddjit galget oažžut buori veahki árrat, go sii dan dárbbašit, ja nu lahka ruovttubáikki go vejolaš. Sis galgá leat vuoigatvuohta oažžut dálkkodeami rievttes áigge rievttes sajis, ollislaš ja buohtalastojuvvon dearvvašvuođa- ja fuolahanfálaldaga olis. Ollislaš ja buohtalastojuvvon dearvvašvuođabálvalusaid sihkkarastet earret eará gelbbolašvuođa nannemiin, ovttasbargosoahpamušaiguin ja buohcceviesuiguin sohppojuvvon dálkkodanplánaiguin. Bálvalusain galgá leat alla dássi, alla divššohassihkarvuohta, oanehis vuordináigi ja dat galget leat nu bures heivehuvvon ovttaskas geavaheaddjái, go vejolaš.

Vuođđu ođđa lágain

Ovttasdoaibmaođastus vuođđuduvvá guovtti láhkii: álbmotdearvvašvuođaláhkii ja dearvvašvuođa- ja fuolahanláhkii. Goabbáge láhka deattuha dearvvašvuođa ovddideami ja ovddalgihtii eastadeami. Dearvvašvuođasuorgi galgá ovddidit aktiivvalaččat álbmotdearvvašvuođabarggu ja fállat ovddalgihtii eastadeami dearvvašvuođabálvalusaid olis ja searvat viiddis álbmotdearvvašvuođabargui, mii fátmmasta olles servodaga.

Fylkkamánni barggut

Fylkkamánni galgá čuovvulit ovttasdoaibmaođastusa ja bargat dan ovdii ahte fuolahit divššohassihkarvuođas, divššohasvuoigatvuođain, bálvalusaid bealuštahttivuođas ja das, ahte divššohasat ožžot dálkkodeami, man hárrái sii leat oadjebasat. Fylkkamánni galgá dasa lassin ovddidit fierpmádagaid ja vásáhusaid lonuhallama, ja dan láhkai leat mielde buohtalastimin ja doarjumin nationála, guovlludási ja báikkálaš aktevrraid, go dat barget ođastusa ollašuhttimiin.

Fylkkamánni galgá maid bagadit ja neavvut guovlluid ja gielddaid aktevrraid. Fylkkamánni galgá maid gozihit, ahte dearvvašvuođafitnodagat, fylkkagielddat ja gielddat ollašuhttet geatnegasvuođaideaset.