Ođđa giellaoahppagirji eatnigielagiidda

Mikael Svonni lea sámegiela professor Romssa Universiteahtas. (Govva: Ravda Lágádus)

Mikael Svonni, sámigielladieđaprofessor Romssa universitehtas– Norgga árktalaš universitehtas, almmuhii mannan vahkkus ođđa giellaoahppagirjji mii lea jurddašuvvon eatnagielagiidda. Girji “Davvisámegiella – sánit ja cealkagat. Láidehus sámi lingvistihkkii” lea láidehus davvisámegiela lingvistihkkii ja lea muhtinlágán ođđaáigasaš grammatihkka.

Ravda lágádus, mii lea ilbmadan girjji, čállá ahte  girjjis čilgejuvvojit davvisámegiela jietnadagat (fonologiija), hámit (morfologiija) ja cealkagat (syntáksa). Dás ii čilgejuvvo viissis davvisámi suopman, muhto oažžu lohkat ahte lea soameslágán girjegiella, vaikko gávdnojit gal oasit main suopmanerohusat váldojuvvojit vuhtii. Dán girjjis čielggaduvvo árbevirolaš cealkkaoahppa, muhto dasa lassin gieđahallojuvvo davvisámegiela syntáksa ođđaset teorehtalš lahkonanvuogi vuođul maiddái. Sierra kapihttalis čilgejuvvo syntávssa teorehtalaš duogáš.

Girji lea jurddašuvvon láidehussan sámi lingvistihkkii vuosttamužžan daidda studeanttaide guđet lohket davvisámegiela eatnigiellan universitehtas. Girji sáhttá gal geavahuvvot iežá nai oahpahusas, erenomážit sámegiela oahpaheddjiid oahpahusas ja maiddái gymnása dahje joatkkaskuvlla dásis, ja maiddái rávesolbmuid oahpahusain, ja sáhttá maiddái leat veahkkin lohkkiide guđet beroštit sámigiela giellaoahpas.