Kaarina Vuolab-Lohi ja Marjaana Aikio ovddasteaba Suoma Sámedikki Sámi Giellagáldu davvisámegiela giellajuhkosis áigodagas 2016 – 2019. Várrelahttun leaba Sierge Rasmus ja Ellen Pautamo. Suoma Sámedikki válgaáigodaga 2016 – 2019 konstitueren dievasčoahkkin válljii ođđa áirasiid giellajuhkosiidda gaskavahku 24.2.2016 Sajosis, Anáris. Norgga ja Ruoŧa Sámedikkiid ovddasteaddjin jotket dálá áirasat.
Davvisámegiela giellajuogus ii leat sáhttán čoahkkanit mearridit ođđa terminologiijas ja normeremis juovlamánu 2015 rájes. Giellajuhkosa Suoma beale áirasiid mandáhta nogai jagi 2015 loahpas. Sámedikkit sáhttet válljet iežaset ovddasteddjiid guhkimusat Sámedikki válgaáigodahkii háválassii. Suomas ledje mannan čavčča sámediggeválggat. Sámedikki ođđa válgaáigodaga vuosttas dievasčoahkkin lei guovvamánu loahpas.
Giellajuhkosa Suoma beale ođđa lahtut eai leat dán govas. Govas giellajuogus čoahkkinastá Gironis, juovlamánus 2015:s. Govven: Mika Saijets
Hálddahuslaččat Sámi Giellagáldu lea Sámi Parlamentáralaš Ráđi (SPR) vuollásaš orgána. Sámi Giellagáldu bargoortnega mielde guhtege riikka Sámediggi evttoha SPR:i iežas riikka ovddasteddjiid. Dasto SPR vállje giellajuhkosiid lahtuid ja várrelahtuid Sámedikkiid árvalusaid vuođul. Jurdda lea, ahte SPR stivra vállje giellajuhkosiid Suoma beale ođđa ovddasteddjiid čuovvovaš čoahkkimis. Dađi bahábut čoahkkinbeaivi ii leat vuos dieđus.
Normeren johtui áramusat cuoŋománus
Davvisámegiela giellajuogus sáhttá čoahkkanit áramusat cuoŋománus. Giellajuhkosa čuovvovaš čoahkkima áššelisttus leat earret čuovvovaš áššit: giellajuhkosa ságadoalli ja várreságadoalli válljen, davvisámegiela Riektačállinrávvagat -girjjáža ja sullii 200 riikkavulošnamahusa meannudeapmi.
Giellajuogus gieđahalai jagi 2015 juovlamánu álggus Norgga Sámedikki ráhkadan Riektačállinrávagirjjáža. Guokte beaivvi bistán vuđolaš suokkardallama maŋŋá giellajuogus árvalii rievdadanárvalusaid ja sáddii Riektačállinrávvagat -girjjáža ruovttoluotta Norgga Sámediggái. Sámediggi lea rievdadan Riektačállinrávvagat -girjjáža. Čuovvovaš čoahkkimis giellajuogus árvvoštallá, sáhttágo giellajuogus normeret Riektačállinrávvagat -girjjáža rávvagiid davvisámegiela riektačállinrávan. Giellajuogus mearridii juovlamánus, ahte Riektačállinrávvagat –girjjáš dohkkehuvvo dasto go giellajuhkosa rávvagat váldon vuhtii.
Riektačállinrávvagat -girjjáža bearbma. Govven: Mika Saijets
Riektačállinrávvagat –girjjáš sisttisdoallá rávvagiid gaskamearkkaid dego rihku, čuoggá, bealle- ja duppalčuoggá, gažaldat- ja čuorvvasmearkka, aisttonmearkkaid, goallos-, jurdda- ja finjusázu, ruođuid ja eará mearkkaid čállima birra. Girjjážis leat riektačállinrávvagat vieris- ja loatnasániid čállimis, heiveheamis ja sojaheamis. Dasa lassin girjjážis leat dieđut earret eará sátnejuohkimis, loguid, goallossániid, laktapartihkkaliid ja oanádusaid riektačállimis.
