Henrik Barruk čállá ubmisámegillii.
Sámi Giellagáldu ubmisámegiela bargolávdegoddi čoahkkanii odne maŋimuš geardde ja dohkkehii virggálaččat ubmisámegiela čállinvuogi. Bargolávdegottis leat njeallje áššedovdi. Henrik Barruk ja Emeritus professor Olavi Korhonen, geat leaba álgoálggus ráhkadan ubmisámegiela čállinvuogi. Soai ovddasteaba Ruoŧa Sámedikki. Norgga Sámedikkiges ovddasteaba Emeritus professor Pekka Sammallahti ja professor Ole-Henrik Magga.
Govas Sámi Giellagáldu ubmisámegiela bargolávdegotti lahtut. Gurot bealde govas Olavi Korhonen, Henrik Barruk, Pekka Sammallahti ja Ole-Henrik Magga.
Badjel 20 siidosaš loahppadokumeanta ubmisámegiela čállinvuogi birra vuolláičállo odne d. 14 ávvodoaluin Margareta girkus Boaresbáikkis, Livššus – ubmisámegiela ođđa čállinvuogi mielde Båriessbájkkien, Lïksjuon.
Ávvodoaluid lágidit Álgguogåhtie -ubmisámesearvi, Lïksjuon sámien seäbrrien ja Lïksjuon kommuvnna sámien rádduo. Sámi Giellagáldu –joatkkaprošeavtta prošeaktahoavda, Marko Marjomaa, rahpá ávvudoaluid, ovdanbuktá Sámi Giellagáldu ubmisámegiela bargolávdegotti lahtuid ja bovde lávdegotti loahpparaportta vuolláičállimii.
Ávvodoaluid prográmma
d. 14.00 rájes Margareta girkus Boaresbáikkis, Livššus.
Ávvodoaluid rahpan, Sámi Giellagáldu ubmisámegiela bargolávdegotti lahtuid ovdanbuktin. Prošeaktahoavda Marko Marjomaa Sámi Giellagáldu –joatkkaprošeakta
Ubmisámegiela čállinvuogi dohkkeheapmi ja bargolávdegotti loahppadokumeantta vuolláičállin. Sámi Giellagáldu ubmisámegiela bargolávdegoddi
Luohti. Sara Helèn Persson juoigi ja ubmisámegiela oahpaheaddji.
Sámi Giellagáldu dearvvahus. Prošeaktahoavda Marko Marjomaa.
Ubmisámegiela bargolávdegotti dearvvahus. Prof. Ole-Henrik Magga.
Čállinvuogi mearkkašupmi ubmisámegielagiidda. Álggugåhtie ubmisámesearvvi ságadoalli Ulla Barruk-Sunna.
Sámi Parlamentáralaš Ráđi ja Ruoŧa Sámedikki dearvvuođat. Ruoŧa Sámedikki stivrra ságadoalli Håkan Jonsson.
Luohti. Sara Helèn Persson juoigi ja ubmisámegiela oahpaheaddji.
Gáfestallan.
Giellagáldu birra
Sámi Giellagáldu lea davviriikkalaš sámegiela fága- ja resursaguovddáš. Giellagáldu lea sámi álbmoga oktasaš ja seammás bajimuš mearridanorgána sámegielaide guoski gažaldagain. Giellagáldu bargá giellafágalaš áššedovdiorgánan ja mearridasámegielaide guoski ođđa terminologiijas ja normeremiin.
Sámi Parlamentáralaš Ráđi (SPR) stivra ásahii ođđajagis 2015:s SPR vuollásaš ubmisámegiela bargolávdegotti. Dát lávdegoddi sirdui Sámi Giellagáldu vuollái go Giellagáldu –joatkkaprošeakta biddjui johtui borgemánus 2015:s. Ubmisámegiela bargolávdegotti mandáhtan lea leamaš dohkkehit ubmisámegiela čállinvuogi.
Eanet dieđut: Prošeaktahoavda Marko Marjomaa Sámi Giellagáldu +358 50 438 2484
