Dáppe gávnnat eanet dieđuid čállinvuogi birra. Loahppadokumeanta lea ruoŧagillii: Ubmisámegiela ortografiija
Sámi Giellagáldu ubmisámegiela bargolávdegoddi vuolláičálii odne badjel 20 siidosaš loahppadokumeantta ubmisámegiela čállinvuogi birra ávvodoaluin Margareta girkus Boaresbáikkis, Livššus dahjege Båriessbájkkien, Lïksjuon nugo dat šaddá áiddo dohkkehuvvon ubmisámegiela virggálaš čállinvuogi mielde.
![Sámi Giellagáldu ubmisámegiela bargolávdegotti lahtut. Olgeš bealde Olavi Korhonen, Ole-Henrik Magga, Pekka Sammallahti ja Henrik Barruk.](https://i0.wp.com/www.giella.org/wp-content/uploads/2016/04/ubmisamegiela-bargolavdegoddi.jpg?resize=600%2C400)
Sámi Giellagáldu ubmisámegiela bargolávdegotti lahtut. Olgeš bealde Olavi Korhonen, Ole-Henrik Magga, Pekka Sammallahti ja Henrik Barruk.
Historjjálaš beaivi
– Dát lea stuorra lávki ubmisámegielagiidda ja dat mearkkaša olu sidjiide, geaid eatnigiellan ja árbegiellan, lea ubmisámegiella. Virggálaš čállingiella addá bistevaš vuođu giellabargguide iešguđet suorggis ja nanne giellaovddideami. Dál lea vejolaš buvttadit iešguđet lágan oahppomateriálaid ja oahpahit ubmisámegiela mánáide ja rávesolbmuide iešguđetge dásis. Dán láhkai ubmisámi mánát leat dássálágaid eará sámi mánáiguin. Ná dadjá Ulla Barruk-Sunna, guhte jođiha Álgguogåhtie ubmisámesearvvi.
Dássážii lea guđa sámegielas leamaš virggálaš čállinvuohki: lulli-, julev- ja davvisámegiela, anáraš- ja nuortalašgiela, ja gielddasámegielas. Dál maiddái ubmisámegiella lea dán listtus. Dát nanne ubmisámegiela sajádaga.
Guhkes geaidnu
Giellagáldu ubmisámegiela bargolávdegotti bargun lei heivehit ja dohkkehit ubmisámegiela čállinvuogi, mainna Henrik Barruk ja Olavi Korhonen leaba bargan nuppelot jagi.
Sámi Parlamentáralaš Ráđi (SPR) stivra ásahii ođđajagis 2015:s SPR vuollásaš ubmisámegiela bargolávdegotti. Dát bargolávdegoddi sirdui Sámi Giellagáldu vuollái go Giellagáldu –joatkkaprošeakta biddjui johtui borgemánus 2015:s. Bargolávdegotti mandáhtan lei dohkkehit ubmisámegiela čállinvuogi. Bargolávdegoddi gearggai odne bargguinis.
Ávvodoaluid Boaresbáikkis, Livššus lágidedje Álgguogåhtie ubmisámesearvi, Lïksjuon sámien seäbrrie ja Lïksjuon kommuvnna.