Sámi Giellagáldu davvisámegiela giellajuogus normerii oktasaš riektačállinrávvagiid. Giellajuogus dohkkehii Norgga Sámedikki čállin Riektačállinrávvagat-girjjáža gaskavahku cuoŋománu 13. beaivvi.
Giellajuhkosa lahttut: (gurut ravddas) Kaarina Vuolab-Lohi, Ravdna Turi Henriksen, Marjaana Aikio, Berit Anne Bals Baal, Marit Anne Allas ja Per Stefan Labba.
Davvisámegiela oktasaš davviriikkalaš riektačállinrávagirji
Davvisámegiela juhkosa jođiheaddji Berit Anne Bals Baal lea ilus go dál gávdno riektačállingirji maid čállit sihke Norggas, Ruoŧas ja Suomas sáhttet geavahišgoahtit. Ovdamearkka dihte čállojuvvo beaivádeapmi iešguđetge láhkai dáid riikkain, ja dan váldá dát girji vuhtii.
Davvisámegiela juhkosa jođiheaddji Berit Anne Bals Baal
– Girji vuhtiiváldá buorebut dán golmma riikka vugiid ja dat lea buoret viggamuš ovtta lágan čállinvuohkái. Nu lohká Giellagáldu davvisámegiela giellajuhkosa jođiheaddji Berit Anne Bals Baal.
Norgga Sámediggi lei dáhtton Sámi Giellagáldu meannudit ođđa čállinnorbmagirjjáža Riektačállinrávvagat. Sámi Giellagáldu davvisámegiela giellajuhkosa mandáhtan lea mearridit normerenáššiin.
Sámi Giellagáldu lea guovtti čoahkkimis meannudan Riektačállinrávvagat -girjjáža. Vuosttaš čoahkkimis juovlamánus á2015:s árvalii giellajuogus rievdadanárvalusaid ja sáddii girjjáža ruovttoluotta Norgga Sámediggái. Sámedikki rievdadusaid vuođul dohkkehii Sámi Giellagáldu Riektačállinrávvagat -girjjáža.
Riektačállinrávvagiin leat dábáleamos čállinrávvagat, earret eará das mo čállinmearkkaid, dego rihku ja čuoggá, galgá geavahit.
Girjjážis gávdná maid dieđuid earret eará vierissániid ja loatnasániid geavaheamis, sátnejuohkimis, beaivádeamis, loguin, goallossániin, laktapartihkkaliin ja álgobustávaid birra. Girjjážii leat maid váldán mielde rávvagiid movt davvisámegiela oanádusat adnojit, ja oanáduslisttu.
Dát girjjáš lea ráhkaduvvon ovddeš Čállinrávagirjji vuođul, man Norgga Sámedikki giellaossodat ja Sámedikki oahpahusossodat almmuhedje 2003:s. Dát girjjáš lei heivehuvvon eanaš Norgga beale čálliide. Ođđa girjjážiin Norgga Sámediggi lea bargan sullii golbma jagi. Girjjáš almmuhuvvo vuos álggos interneahtas, muhto dat deaddiluvvo maid farggamusat.
