![](https://i0.wp.com/upload.wikimedia.org/wikipedia/commons/9/98/Denali_National_Park_Ptarmigan.jpg?resize=390%2C305&ssl=1)
Rievssat lonuhišgoahtán dálvedolggiid.
Sarvát leat čallagoahtán juo borgemánus ja álddut ja čearpmahat čallet čakčamánus.
Čakčamánus rievssahat lonuhišgohtet geassedolggiid jievja dálvedolggiide ja njoammil ja njálla jievja dálveguolggaide, muhto nu dahket eará eallitnai, lonuhit geassefárdda suhkkes dálvefárdan.
Čakčamánus bivdit dálveguliid meahccejávrriin. Čuovža dáidá das leat buoremus guolli.
Čakčamánus leat gilde-márjjavahkku, biráhisvahkku, máhtesmeasvahkku ja mihkkalmasvahkku
Gilde-Márjjávahku áigge lea buorre murjet ja beaskidit sávzzaid.
Biráhisvahkus lávejit leat garra biekkat ja čakčamánu nuppi vahku gohččodit lastarámadahkan goas lasttat gahčagohtet muorain. Lastariđđu lea biegga, mii váldá lasttaid muorain.
Máhtesmeasvahku álgá ragat ja luossa lea gođđame. Dan vahkus maid váldet buđehiid bealddus.
Mihkkalmasvahkus lea čakčajorggáldat (čakčadássebeaivi). Dalle idja ja beaivi lea ovtta guhkku.
Gáldut:
Eira Murud, M.M. (2012): Jahki Sámis, Luondduolbmo Birgen
Deanu giellagáddi: Sámi almmenáhkki 2014
http://www.siida.fi/sisdoallu/8-jagiaiggi/cakca
Govat:
Bigga-Helena Magga
https://upload.wikimedia.org/wikipedia/commons/9/98/Denali_National_Park_Ptarmigan.jpg
____________________________________________________________________________
Giellagáldu čálligoahtá maiddái davvisámegillii jeavddalaččat áigeguovdilis dáhpáhusain ja muđui miellagiddevaš dahje hávskes áššiin mat gusket davvisámegiela . Čállosat almmustuvvet Sámi Giellagáldu neahttasiiddus ja Facebook-siiddus.