Kove: Anne Karhu-Angeli
Čakčagalbmasiin eatnamii, šattuide ja stohporobiide ihtá bihci. Bihci ii dábálaččat bistte guhká, jándora dahje guokte ja fas suddá.
Ritni lea muorain, bávttiin ja eará ceakko sajiin. Dat lea jiekŋun mii lea šaddan áimmu láktasis. Jiekŋarini, mii lea muorain omd. šlahtti maŋŋá, gohččodit šuhčin.
Ritni lea dálvet muorain. Ritni sáhttá leat mánnoviissaid. Juos lea goalki hui guhká, ii ritni gahča. Easka biegga ráidne mehciid. Dálvet hárvet bivalda nu ahte muohta gahččá muorain, easkka giđđadálvvet nie geavvá. Muhto dalle lea suddagoahtán muđuige.
Muhtin boazu lea bihceguolga. Dan guolgageažit leat vielgadat, muhto muđui das lea dábálaš ivdni. Muzet lea hui hárvet bihceguolga. Váibbat boares hearggis lea smarfásan guolgageahčči ja dat lea veahá vilggodan. Dan sáhttá maid gohččodit bihceguolgan.
Gáldut:
Spilddis bivlii – muohta- ja dálvesániid čoakkáldat. 2011. Sverre Porsanger (doaimm.)
