Min birra

Dán siiddu dieđut leat ođasmahtton 16.03.2016

Sámi Giellagáldu lea davviriikkalaš sámegiela fága- ja resursaguovddáš. Giellagáldu lea sámi álbmoga oktasaš ja seammás bajimuš mearridanorgána sámegielaide guoski gažaldagain. Mii bargat giellafágalaš áššedovdiorgánan ja mearridat sámegielaide guoski ođđa terminologiijas ja normeremiin.

Mii fállat giellaveahki ja rávvet sámegielaid geavaheapmái guoski gažaldagain. Giellageavaheaddjit sáhttet sáddet midjiide giellagažaldagaid Facebooka ja e-poastta bakte dahje jearrat telefovnna bakte ráđi. Mii rávvet nuvttá giellagažaldagain, mat gusket lulli-, julev-, ja davvisámegillii ja anáraš- ja nuortalašgillii. Bargiid oktavuohtadieđuid gávnnat dáppe.

Dasa lassin mii bargat báikenamaiguin, giellagáhttemiin, giela ovddidemiin ja nammabálvalusain.

Ovddasvástádussuorggit

Giellagáldu lea Sámi Parlamentáralaš ráđi vuollásaš orgána. Sámi Giellagáldus lea stuorámus ovddasvástádus sámi giellaovttasbarggus, giellaámmátlaš barggus ja sámegiela giellabálvalusaid addimis giellageavaheddjiide. Guovddážá ulbmilin lea seailluhit ja ovddidit dan kulturárbbi, mii gullá sámegillii ja ná doaibmat fágalaš áššedovdiorgánan, ovttastahttit ja heivehit oktii sámegiela geavaheapmái ja gáhttemii guoski doaimmaid ja koordineret sámi giellaovttasbarggu.

Giellagáldu ovddasvástádussan lea ovttas Sámedikkiiguin:

• nannet ja ovddidit davviriikkalaš giellaovttasbarggu
• nannet ja ovddidit sámegiela nu, ahte guhtege giellajoavkku sierranas dárbbut, hástalusat ja resurssat váldojit vuhtii, ja
• riggudahttit sámegiela ja sihkkarastit dan boahtte áiggis

Guovddáža bargun lea gozihit buot sámi giellasuorggi gažaldagaid ja koordineret daid ovttasbarggus sámedikkiiguin ja eará sámi giellasuorggi institušuvnnaiguin. Dasa lassin guovddáš galgá doallat oktavuođa sierra ásahusaide ja juohkit dieđuid sámi giellaámmátlaš gažaldagain olles Sámis ja riikkaidgaskasaččat. Guovddážii lea ulbmilin čohkket sámegiela giellabálvalusaid, mat veahkehit gávdnat dieđuid sámi giellaámmátlaš jearaldagain.

Golmma jahkásaš Interreg-prošeakta

Giellagáldu doaibmá prošeaktaruhtademiin. Norgga, Ruoŧa ja Suoma Sámedikki álggahedje Sámi Giellagáldu -joatkkaprošeavtta 01.08.2015. Prošeavtta ruhtadit EU Interreg Davvi V Sápmi –oasseprográmma, Norgga, Ruoŧa ja Suoma Sámedikkit, Lappi lihttu ja Romssa fylkkasuohkan. Prošeavtta jođiha Suoma Sámediggi. Prošeakta bistá 31.05.2018 rádjái.