Ruvdnaprinsabára foanda
Ruvdnaprinsabára foanda dáhttu fátmmastit nuoraid mat iešguđetlágan, ja dávjá ovttastuvvon sivaid geažil leat šaddan olggobeallái. Ruvdnaprinsabára foanda dáhttu dahkat Norgga nuoraide juoidá mii dahká erohusa.
Eatnasat vásihit hástalusaid go galget lávket nuorravuođa eallimis rávisolbmuid eallimii. Dien rašes eallindilis sáhttet máŋggas oalát juo gáidat dan servvolašvuođa olggobeallái mii buohkaide galggašii ásahit buori dili ja vejolašvuođaid.
Ruvdnaprinsabára foanda dáhttu
- čalmmustahttit dan man mearrideaddji dehálaš áigi nuorravuohta lea olbmo eallimis – movttáskahttet ja láhčit dili nu ahte nuorat sáhttet geavahit iežaset vejolašvuođaid ja návccaid.
- álggahit doaimmaid mat sáhttet váikkuhit dasa ahte nuorat sáhttet ovdánahttet iežaset návccaid ja oassálastet servvolašvuhtii.
- doarjut prošeavttaid maid áiggi mielde sáhtášii ovddidit ja kopieret. Dan láhkái sáhttá doaibma lea máŋgasii ávkin áiggi mielde
Foanda dáhttu válljet prošeavttaid mat leat vuođđuduvvon máhtolašvuhtii ja vásáhusaide maid leat čohkken sihke dáppe riikkas ja olgoriikkain.
Dán áigodaga ovttasbargoprošeavttat
Go ledje geahčadan 100 nuoraidprošeavtta dárkilit, de válljejedje njeallje prošeavtta golmma jagi ovttasbargui 2011 rájes.
Foandda prošeavttat dán áigodagas leat:
- Vibro
- Ung Invest AIB
- Trivselsleder
- Lærervikaren
Loga eambbo prošeavttaid birra foandda siidduin dahje prošeavttaid iežaset siidduin.
Ekonomiija ja ovttasbargoguoimmit
Foandda ekonomalaš vuođđun leamaš guokte attáldaga (kr.1,- juohke riikkaássi nammii) maid Ráđđehus attii – álggos go foanda ásahuvvui borgemánu 25.beaivvit 2001 ja dasto fas go foanda lei doaibman vihtta jagi, borgemánu 25.beaivvi 2006.
Dasa lassin dorjot Norgga ealáhusaid ovttasbargoguoimmit foandda ekonomalaččat dahje pro bono bokte.
Organiseren
Foandda jođiha stivra man jođiheaddji lea Eivind Reiten. Ruvdnaprinsa Haakon ja Ruvdnaprinseassa Mette-Marit leaba stivralahtut. Irene Lystrup lea foandda beaivválaš jođiheaddji.
Stivrra doarjjan lea fágapanela prošeavttaid válljemis.
Eanet dieđuid oaččut foandda iežas siidduin.