Máilmmi ekonomalaš forum

Ruvdnaprinsa Haakon lei vuosttaš geardde Davos čoahkkimis 2005:s. 2013:s lei Ruvdnaprinsa čuovvovaš Leaders sešuvnna digaštallama jođiheaddji: Born or made, ja 2011:s lei sus sáhkavuorru árvovuđot jođiheami birra. 2009:s lei son mielde beavddebirra ságastallamis, oktan máttaafrihká ráfibálkášumi vuitiin Desmond Tutu. Dalle lei sáhka dan birra makkár mearkkašupmi árvvus lea go bargá positiiva máilmmiovdánemiin. Dat lei maid fáddán Davos loahpahančoahkkimis 2007:s, gos maid Ruvdnaprinsa searvvai digaštallamii. Son lei maid mielde ságastallamis man fáddá lei entreprenørdoaimmat.

2006:s jođihii Ruvdnaprinsa Haakon beavddebirra ságastallama dan birra movt dovddus ja almmolaš olbmot sáhttet váikkuhit humaniteara bargguide.

Ruvdnaprinsa lea maid searvan áššái čállosiinnis ”The Power of Dignity” raporttas ”Islam and the West : Annual Report on the State of Dialogue dialoge 2008. Raportta sáhttá olles hámis lohkat go čuovvu čujuheaddji dás olgešbealde.

Nuorra jođiheaddjit

Ruvdnaprinsa Haakon lea leamaš Young Global Leaders (YGL) miellahttun juo dan rájes dat álggahuvvui 2005:s. Dát fierpmádat, mas leat mielde vuollel 40 jahkásaš jođiheaddjit, lea nuoraid deháleamos jietna Máilmmi ekonomalaš forumii. 2009 miellahtuin lei duogáš 71 riikkas, buot guovlluin máilmmis, ja sis leat jođiheaddjivirggit ealáhusain, politihkas ja servodateallimis, dutkamiin, eaktodáhtolaš organisašuvnnain ja mediain. Sin oktasašvuohta lea ahte sis lea dehálaš sajáidat servodagas danin go sis lea jođihandoaibma. Badjelaš 100 miellahtu bovdejuvvojit jahkásaš Máilmmi ekonomalaš forumii Davosis.

2009:s lea YGL bargu čalmmustahttán dan movt hábmet oaiviliid Global Redesign Initiative:

Global Redesign Initiative

Máilmmi ekonomalaš forum ásahii Global Redesign Initiative (GRI) ođđajagimánus 2009. Ulbmil dáinna doaimmain lea gávnnahit konrehtalaš čovdosiid mat dagaše máilmmiservodaga čeahpibun čoavdit stuora máilmmiviidosaš hástalusaid. Bohtosat ja rávvagat ovdanbuktojuvvo jahkečoahkkimis Davosis ođđajagimánu 2010, ja daid galget čuovvolit viidáseappot jagi 2010 mielde. Forum lea ásahan bargojoavkkuid fierpmádaga (Global Agenda Councils), man ovddasvástádus lea buktit oaiviliid prosessii mainna dál leat bargamin. Dáin joavkkuin leat mielde badjel 1.000 ekspeartta ja sii gokčet badjel 50 fáddásuorggi – čáhcedilálašvuođas gitta pandemiaide ja migrašuvdnii.

Ruvdnaprinsa lea mielde ekspeartajoavkkus mii bargá árvvuiguin. Ruvdnaprinseassa Mette-Marit, gii lea ON aidsprográmma UNAIDS earenoamáš sáttaolmmoš, lea mielde joavkkus mii bargá nuoraiguin ja dearvvašvuođain.

Ruvdnaprinsa Haakon jođiha Young Global Leaders' barggu mii guoská Global Redesign Initiative. YGL barggus lea guhtta bajitmearrideaddji fáttá: Árvvut, demokráhtalaš stivrenvuohki, oahpahus ja nuorat, dearvvašvuohta, dálkkádagat ja biras ja servodatekonomiija.