Biras ja dálkkádagat
Ruvdnaprinsa atná stuora beroštumi birrasii, ja son lea earenoamážit searvan gažaldagaide mat gusket dálkkádagaid nuppástuvvamiidda ja makkár váikkuhusaid dat dagahit. Ruvdnaprinsa lea earenoamáš fuola atnán Árktalaš ja Antárktalaš guovlluid dilálašvuođaide.
Ruvdnaprinsa Haakon lei Polarjagi 2007 – 2008 suodjaleaddji. Polarjahki lágiduvvui njealját geardde, ja dat mearkkašii ahte dutkanfámut badjel 60 riikkas biddjojuvvo oktiidoaimmahit beaktilis doaimmaid mat galget oažžut min buorebut ipmirdit Árktalaš ja Antárktalaš guovlluid.
Dán doaimma oktavuođas finai Ruvdnaprinsa guovtti mátkkis, Svalbárddas ja Ruonáeatnamis, ovttas skandinávia truvdnoárbbolaččaiguin – Danmárkku Ruvdnaprinssain Frederik ja Ruoŧa Ruvdnaprinseassain Victoria.
Dutkanmátki Svalbárdii
Diet golbma truvdnoárbbolačča ledje buohkat Polarjagi suodjaleaddjit guhtege su riikkastis. Oassin dán čalmmustahttinbarggus, manne sii jiekŋacuvkenfatnasii Oden ja čuvvo dutkanfatnasa vihtta beaivvi áhpefávlliin Spitsbergen guovllus.
Dutkanfatnasis čuvvo Ruvdnaprinsa Haakon, Ruvdnaprinsa Frederik ja Ruvdnaprinseassa Victoria logaldallamiid birrasa ja dálkkádagaid nuppástuvvamiid birra. Maŋŋil, Ny Ålesunddas, fitne sii dutkanštašuvnnain Sverdrup ja Zeppelin, maid Norsk Polarinstituhtta jođiha.
Mátki loahpahuvvui Longyearbyenis. Doppe finai Ruvdnaprinsa Svalbárdda Universitehtaguovddážis, gos oaččui dieđuid gilvvavuorkkáid ja CO2-keahtes Svalbárdda birra.
Dálkkádagaid nuppástuvvamat Ruonáeatnamis
Jagi maŋŋil čuovvoledje sii Svalbárdda mátki, go dalle fitne truvdnoárbbolaččat Ruonáeatnamis. Ulbmil mátkkiin lei čalmmustahttit dálkkádagaid nuppástuvvamiid mat dáhpáhuvvet Ruonáeatnamis, ja movt dat váikkuhit doppe ássi álbmogii. Inspekšuvdnafanas Ejnar Mikkelsen lei sin váldobáiki, ja doppe sii čuvvo logaldallamiid dan birra makkár dálkkádatnuppástuvvamat Árktalaš guovllus leat. Ja sii besse ieža áicat ja oaidnit movt luondu gos sii vánddardedje lea rievdan. Ovdamearkkadihte lea Ilulissat jiehkki maŋásmannan 15 km danin go čáhci dan vuonas gosa jiehkki ollá, lea šaddán lieggaseabbo. Mátkkis besse maid fitnat dutkanstašuvnnain ja guovddážis gos barget vejolaš earalágan energiijain.
Girjeprošeakta
Truvdnoárbbolaččaid Svalbárdda ja Ruonáeatnama muosáhemiid ja vásáhusaid boađus lei ahte 2009 čavčča almmuhuvvui girji "Kongelig polartokt". Girjái lea Ruvdnaprinsa Haakon, Ruvdnaprinseassa Victoria ja Ruvdnaprinsa Frederik guhtege čállán sierra kapihttala. Dasa lassin leat dutkit Minik T. Rosing, Anders Karlqvist ja Pål Prestrud čállán polardutkama ja dálkkádatgažaldagaid birra – ja mii sin mielas berre dahkkot. Girjji vuovdindienas galgá geavahuvvot buriide doaimmaide.