Fokus: Mánát ja nuorat

Dalle go Ruvdnaprinsabára humaniteara foanda ásahuvvui sudno heajaid oktavuođas, de daddjui juo ahte dan foandda doarjagiid juogadeamis galget leat guokte váldoulbmila: Internašunála dearvvašvuohta ja oahppu – ja mánáid ja nuoraid bajásšaddandilli Norggas. Goasii dakkaviđe oaččui Rukses Ruossa Lohkanveahkki doarjaga foanddas, ja nu maid Norsk Folkehjelp prošeakta Følgesvennen – mii lea oktonas vuolleahkásaš dorvoohcciid váste.

Searvadahttin

Ruvdnaprinsabárra lea iežaska foanddain čalmmustahttán nuoraid geain leat earenoamáš dárbbut – ja leaba bargan dan badjelii ahte buohkat galget dovdat ahte sii leat searválaga earáiguin. Buorre ovdamearka dasa lea Vard-bargovuohki maid Vard spábbačiekčanjoavku Haugesunddas čađaha. Sii barget hui oktageardánis vuogi mielde gierdavašvuođain, searvadahttimiin ja nuoraide hutkat áiggegoluid.

Ruvdnaprinseassa lea maid bargan nuorra dorvoohcciiguin báikkálaš servodagain.

Ruvdnaprinsabárra lea earet eará bovden Hvalstad dorvoohcciid vuostáiváldima bowlingai, ja soai leaba maid searvan čierastallamii gos basse márffiid olgun. Ruvdnaprinseassa atná stuora fuola das ahte mánát ja nuorat oččoše oadjebas bajásšaddanbirrasiid, gos sii beasaše čájehit iežaset vejolašvuođaid, návccaid ja iešvuođaid.

Nuoraid vejolašvuođat

Maŋemus jagiid lea Ruvdnaprinseassa gidden earenoamáš beroštumi dasa movt nuorat sáhttet váikkuhit buori ovdáneapmái – sihke iežaset eallimis ja servodagas muđui. Son berošta ollu das ahte doarjut nuoraid nu ahte sii dustet luohttit alcceseaset, ja vai ožžot doarjaga geavahit daid vejolašvuođaid mat sis leat – ja ahte sii besset dan dahkat. Dan leat oaidnán earenoamážit su hiv ja aids bargguin, gos Ruvdnaprinseassa áŋgirit bargá doarjut nuoraid geat barget aids eastademiin – ja su mielas lea dehálaš ahte nuorat besset bidjat sihke strategalaš ja praktihkalaš máilmmiviidosaš bargguide agenda.

Eará suorgi dán barggus lea psyhkalaš dearvvašvuohta. Ruvdnaprinseassa searvá oalle dávjá lágidemiide gos váldosáhkan lea ahte galgá leat rabasvuohta nuoraid psyhkalaš dearvvašvuhtii guoskivaš áššiin. Ja gos maiddái lea váldofáddan dat ahte njeaidit ovdagáttuid mat gusket psyhkalaš dearvvašvuhtii. Eará suorgi nuoraidbarggus masa Ruvdnaprinseassas lea stuora beroštupmi, lea oahppu ja kreatiiva doaimmaid čađaheapmi. Lágideamit mat gusket nuoraid iežaset filbmafestiválii, Amandusfestivála Lillehammeris, lea okta dain lágidemiin gos Ruvdnaprinseassa beassá deaivvadit nuoraiguin.

Ruvdnaprinseassa bargá mánáid áššiiguin sihke Speidern, mánáidsuodjalusa ja skuvlaguossástallamiid oktavuođas. Dasa lassin doaibma son maid dehálaš doarjjan Ruvdnaprinsii su Global Dignity bargguin – dat leat ságastallamat skuvlanuoraiguin árvvuid birra.