Fokus: Innovašuvdna ja arkitektuvra

Ruvdnaprinseassa atná fuola das movt min biras váikkuha midjiide olbmuide – ja makkár birrasii váikkuheaddji bealli arkitektuvrras lea. Son atná maid fuola das ahte arkitektuvra ja design lea dehálaš ealáhus Norggas – dat lea dakkár ealáhussuorgi maid lea miellagiddevaš čájehit internašunála márkaniin.

Su beroštumi oaidná sihke das movt son oainnusindahká Norgga arkitektuvrra olgoriikkain, našuvnnalaš ja internasuvnnalaš designčájáhusain ja konferánssain, fitnodatguossástallamiin – gos son čuovvu bargguid jurdaga rájes gitta gárvves duodjái – ja maiddái su lagas ovttasbarggus norgalaš bivttasdesignariiguin.

Ceavzilis bivttasmállet

Ruvdnaprinseassa  Mette-Marit lea máŋgga geardde leamaš mielde 100 % Norway designčájáhusa almmolaš rahpamis Londonis.

Ruvdnaprinseassa lea rahpan čájáhusaid Thailánddas, Malaysias ja Mexicos main norgga arkitektuvra leamaš fokusis.

Ruvdnaprinseassas alddis lea maid stuora beroštupmi ceavzilis bivttasmálledoibmii ja estehtalaš gávppašeapmái. 2012 čavčča lei sus sáhkavuorru vuosttašroavváid ja mohtasuorggi olbmuid lunššas New Yorkas, maid Fashion 4 Development lágidii. Doppe lei ge sáhka juste das ahte movt mohtasuorgi sáhttá vuhtiiváldit ceavzilvuođa olles árvogeavllis.

Fitnodatguossástallan

Ruvdnaprinseassa Mette-Marit lea fitnan ollu designfitnodagain miehtá Norgga. Stohpogálvoindustriija lea Norgga stuorámus designindustriija mii beaggá maiddái olgoriikkain. Stohpogálvosuorggi 100-jagi ávvudeamis skábmamánus 2009 finai Ruvdnaprinseassa Sykkylven stohpogálvogilis Sunnmøres gos beasai oaidnit movt stohpogálvofabrihkat Ekornes ja L.K. Hjelle ráhkadit stohpogálvvuid.