Fokus: Psyhkalaš dearvvašvuohta

Ruvdnaprinseassa bođii dán áššis hui čielgasit ovdan 2004:s, go son lei TV-akšuvnna Hjerterom alla suodjaleaddji. Dan akšuvnna ruhtačoaggin lei Kirkens Bymisjon ja Rådet for psykisk helse várás. Dan rájes leamaš sus hui stuora beroštupmi dien fáddii, ja lea Psyhkalaš dearvvašvuođaráđi suodjaleaddji. Son lea maid leamaš Kirkens Bymisjon stivrras.

Guossin Skaugumis

TV-akšuvnna oktavuođas lágidii Ruvdnaprinsabárra vuosttaš geardde guossemállásiid Skaugumis, mii lea Ruvdnaprinsabára ássanbáiki Askeris. Dan rájes dat leat lágiduvvon juohke jagi.

Juohke čavčča 2004 rájes lea Ruvnaprinsabárra bovden guossi miehtá riikka geaidda dát fáddá juogaládje guoská. Ovttasbargit barget iešguđetládje dan ala ahte ásahit lieggasit servodaga masa olbmot buorebut nákcejit searvat. 2009:s ovttasbarggai Ruvdnaprinsabárra Girku Gávpotmišuvnnain, Frelsesarmeain, Landsforening for barnehjemsbarn ja gáhttamagasiinnain Erlik Oslo. 

Psyhkalaš dearvvašvuođaráđđi

Ruvdnaprinseassa Mette-Marit lea leamaš Psyhkalaš dearvvašvuođaráđi suodjaleaddjin 2001 rájes. Son lea leamaš ollu báikkiin ja deaivvadan olbmuiguin geain leat psyhkalaš gillámušat ja sin lagamuččaiguin.

Ruvdnaprinseassa lea juohke jagi leamaš mielde lágidemiin mat čalmmustahttet psyhkalaš dearvvašvuođa Máilmmibeaivvi, mii lea golggotmánu 10.beaivi. Dan beaivvi leat lágideamit miehtá máilmmi maid ulbmil lea diehtojuohkin ja dat ahte olahit eanet rabasvuođa psyhkalaš dearvvašvuođa birra. Diet Máilmmibeaivi lea markerejuvvon 1992 rájes.

Psyhkalaš dearvvašvuođaráđđi lea friddja, humaniteara organisašuvdna masa gullet 25 miellahttosearvvi. Ráđđi bargá ásahit nu buori eallima go vejolaš mánáide ja nuoraide geain leat psyhkalaš váttisvuođat, ja maiddái sin lagamuččaide. Organisašuvdna bargá ovddidit ollislaš veahki ja searvadahttima bargoeallima ja maiddái hástalusaigin mat gusket dakkár diliide gos šaddet bággodoaimmaid čađahit.