Fokus: Rukses Ruossa
Ruvdnaprinseassa lea Rukses Ruossa bissovaš suodjaleaddji. Dan suodjalandoaimma válddii son badjelasas Gonagalaš Allavuođas Dronnegis 2005:s.
Organisašuvnna barggut sisttisdollet ollu daid doaimmaid maiguin Ruvdnaprinseassa bargá eará surggiin: Searvadahttin, dearvvašvuohta (hiv ja aids), mánáid ja nuoraid barggut ja eaktodáhtolašvuohta.
Ruvdnaprinseassa Mette-Marit doalai sáhkavuoru Rukses Ruossa oktasaščoahkkimis čakčat 2010. Son deattuhii earet eará dan man dehálaš lea láhčit dili nu ahte buohkat sáhttet bargat juoidá návccaidis ektui;
”Buohkat galget beassat leat servodagas mielde – iežaset návccaiguin ja iežaset eavttuid mielde. Juohke áidna olmmoš min servodagas sáhttá bargat juoidá. Go barggan olbmuiguin, de oainnán man dehálaš lea dien muitit. Ii álggos geahččat masa olmmoš dárbbaša veahki, muhto maid son sáhttá bargat ávkin. Go diekkár vuolggabáikkis álgá, de lea álkit oaidnit movt sáhttit veahkehit láhčit dilálašvuođa nu ahte olbmot sáhttet geavahit návccaideaset juogamasa ávkin.”
Stuora bargoviidodat
Rukses Ruossa-doaimmat main Ruvdnaprinseassa lea leamaš fárus, leat earet eará: Knytt et Bånd kampánja rahpan Budeajus, veahkkekorpssa dálvehárjehallan Vikaváris, juovlakonsearta Oslo giddagasas ja guossástallan Rukses Ruossa visttiin Bærumis, Lillehammeris ja Bergenis.
Jagiid mielde lea Ruvdnaprinseassa fitnan Rukses Ruossa doaluin eanas osiin riikkas;
”Dušše ovtta jagis lean fitnan geahččame movt Rukses Ruossa bargá olbmuiguin geat rahčet oktovuođas, fierpmádathuksemiin olbmuide geat rahčet badjelmearálaš gárrenmirkogeavahemiin dahje geat leat čohkkán giddagasas, girjáivuođain ja máŋggakultuvrralašvuođain, olbmuiguin geat ellet suoivvanbealde ja movt lágidit gádjun-ja gearggusvuođabargguid. Diein guossástallamiin lean oaidnán dušše unna oasáža dain ollu bargguin maid Rukses Ruossa doaimmaha miehtá min riikka. Muhto guossástallamiin lean oahpásnuvvan organisašuvnnain mii hui earenoamáš dásis nákce hálddašit ođđa humaniteara hástalusaid ođđa doaibmabijuiguin, ja mii seammás lea nagodan doalahit ja nannet doaimmaid mat leamaš Rukses Ruossa dovdomearkan juo ollu, ollu jagiid ja maidda ain lea stuora dárbu otná servodagas Norggas.”
Ruvdnaprinseassas lea maid leamaš eanet dadjamuš plánenbargguin mat gusket dasa movt láhčit doaimmaid sisafárrejeaddji nissonolbmuide Oslos, dan oktavuođas go son lea mielde Oslo Rukses Ruossa bargojoavkkus. Bargojoavku bargagođii FAFO raportta sisdoalu dieđuid vuođul, gos bođii ovdan ahte sisafárrejeaddji nissonolbmuin. Joavkku barggu boađusin lei Stella nissonolbmuidviesu ásaheapmi Oslo gávpotguovddážii. Guovddážis lei almmolaš rahpan 2012 giđa, ja Ruvdnaprinseassa čuovui rahpandilálašvuođa.