Majestehta Dronnet Sonja dáiddárstipeanda

Vuođđudus ásahuvvui 2011:s, ja geassemánu 14. beaivvi 2012 addojuvvui Queen Sonja Nordic Art Award vuosttaš geardde. Bálkkašupmi lei davviriikkalaš bálkkašupmi ja kandidáhtat ledje árvaluvvon buot viđa davviriikkain.

2014 bálkkašumi juohkima oktavuođas almmuhuvvui stuorát rievdadeapmi: Bálkkašupmi viidduduvvo internašuvnnalaš bálkkašupmin, ja namma rievdaduvvo ja šaddá The Queen Sonja Print Award. Min dieđuid mielde lea dá dat stuorámus bálkkašupmi mii gávdno gráfalaš dáidasuorggis. 

Bálkkašupmi lea 400 000 ruvdnosaš stipeanda. Dasa lassin beassá vuoiti bargat ja oahppat Ole Larsens dáiddalaš bargosajis Helsingborggas. 

Vuostáiváldit

Bálkkašupmi maid vuođđudus hálddaša, juhkkojuvvo juohke nuppi jagi. Dán rádjái leaba čuovvovaččat ožžon dan bálkkašumi:

• 2012: Tiina Kivinen, Suopma
• 2014: Svend-Allan Sørensen, Danmárku
• 2016: Tauba Auerbach, USA

Kjell Nupen Memorial Grant

Dát stipeanda ásahuvvui 2014 čavčča, dáiddár Kjell Nupenii muitun, gii jámii njukčamánu 12. beaivvi 2014. Dat galgá juogaduvvo juohke nuppi jagi muhtun davviriikkalaš dáiddárii gii lea gráfalaš dáiddasuorggis dahkan mearkkašahtti barggu, ja dat juogaduvvui vuosttaš gearddi dán jagi.

Stipeanda lea ovttasbargu mas leat fárus Queen Sonja Art Foundation ja measttirdeaddeleaddji Bill Goldston, Universal Limited Art Editions New York. Lea Queen Sonja Art Foundation stivra mii vállje vuoiti, ja dat galgá almmuhuvvot Kjell Nupena riegádanbeaivvi čakčamánu 5. beaivvi.

Vuostáiváldit

• 2015: Adam Saks, Danmárku

Organiseren

Vuođđudus H.M. Dronning Sonjas kunstnerstipend ásahuvvui ođđajagimánu 14. beaivvi 2011. Vuođđudeaddjin lei Majestehta Dronnet ovttas govvadáiddariiguin Kjell Nupen, Ørnulf Opdahl ja Ole Larsen.

Stivrras leat Dronnet Sonja, Ørnulf Opdahl, Ole Larsen, Magne Furuholmen, Harriet Cecilie Malm Brundtland, Erlend Høyersten ja Gry Mølleskog. Karianne Ryen Eriksen lea prošeaktajođiheaddji ja beaivválaš jođiheaddji lea Mette Tverli.

Vuođđudusa kapitála

2010:s álggahedje Dronnet Sonja, Kjell Nupen, Ørnulf Opdahl ja Ateljé Ole Larsen ovttasbarggu, dáiddaprošeavtta "Tre reiser – tre landskap", Golbma mátkki - golbma eanadaga. Dronnet, Kjell Nupen ja Ørnulf Opdahl ráhkadedje gráfalaš máhpaid vuovdima várás. Dáiddamáhpaid vuovdima dienas manai ollislaččat Majestehta Dronnet Sonja dáiddarstipeandda vuođđudussii, ja dat dienas lea vuođđudusa kapitála, oktan eará skeaŋkkaiguin ja attáldagaiguin.