Nelson Mandela muitodilálavuohta
Gonagasla Allavuohta Ruvdnaprinsa Haakon ja stáhtaministtar Erna Solberg ovddasteigga Norgga Nelson Rolihlahla Mandela muitodilálavuođas Johannesburggas disdaga juovlamánu 10.beaivvi. 80 000 olbmo, geaid searvvis ledje eatnat stáhta- ja ráđđehusoaivámuččat, gudnijahtte Mandela muittu dieinna dilálavuođain.
Muittaandilálavuohta lágiduvvui dan spábbačiekčanbáikkis gos Nelson Mandela maŋemus gearddi lei almmolavuođas, namalassii Máilmmigilvvuin spábbačiekčamis 2010. Son gudnijahttojuvvui rohkosiiguin, sártniiguin ja lávlagiiguin.
Lulli-Afrihká vuostta čáhppesvarat presideanta jámii juovlamánu 5.beaivvi 2013, 95 jagi boarisin.
Barggai soabalavuođa ovdii
Mandela attai friddjavuođa ja dásseárvvu symbolan, ja symbolan apartheid nállevealáhanstivrejumi vuostálastinbargguide Lulli-Afrihkás.
Son čohkkái 27 jagi giddagasas, ja go beasai luovos 1990:s, de son bargagođii njunnois ásahit politihka mii galggai čalmmustahttit ráfi ja soabalavuođa. Dan barggu ovddas addojuvvui sutnje Nobel ráfibálkkaupmi 1993:s. Dan oaččui son ovttas Lulli-Afrihká dalá presideanttain Frederik Willem de Klerk.
Nanu báttit
1994:s válljejuvvui Nelson Mandela riikka vuostta presideantan friddja válggain, maidda buot riikka boargárat besse searvat. Nelson Mandela lei stáhtaguossástallamis Norggas 1999:s. Norgga ja Lulli-Afrihká gaskkas leat nanu báttit, ii unnimustá dan dihte go Norga doarjjui ANC apartheid vuostálastinbargguid.
«Mandela jápmima oktavuođas celkkii Gonagas: «Mus leamas nu lihkku ahte lean beassan suinna deaivvadit máŋgga geardde. Nelson Mandela lea munnje leama ovdagovvan. Lean ovddoan su jođihannávccaid, duostilvuođa ja viisodaga. Son nagodii buot buoremus beliid gávdnat sihke alddis ja eará mieldeboargáriin dakkár dilálavuođas gos veahkaválddálavuohta ja bahávuođa mávssahanhállu ráđđii. Son lea máilbmái čájehan ahte lea vejola válljet ráfi mávssaheami sadjái, ahte olmmo sáhttá válljet dan mii hukse dan sadjái go dan mii njeaidá.»
Mandela hávdáduvvo ruovttugilistis Qunus sotnabeaivvi juovlamánu 15.beaivvi.