Fylkkamátkkis Finnmárkkus
Odne iđđes lávkiiga Majestehtaguovttos Gonagas ja Dronnet gáddái Fálesnuoris. Doppe álggahii Gonagasbárra iežas fylkkamátkki dán jagi. Soai galgaba fitnat min guđa davimus suohkaniin.
Sátnejođiheaddji Ragnar Olsen ja ollugat Fálesnuori 1000 ássiin ledje boahtán dearvvahit Gonagasbárrii buresboahtima. Suohkan lea nuortta lulábealde Hámmárfeastta, ja lea suohkan gos leat vuonat ja nuorit – ja maiddái šattolaš vuovddit ja buorit luossajogat.
Ráđđeviesu luhtte ledje ordnen álbmotfeastta, doppe lei musihkka ja sártnit. Gonagasbárra beasai gullat sihke mánáid ja rávisolbmuid, koaralávluma ja náittosbárra Janne ja Hanna Leena Kankaala čuojaheigga jazzmusihka. Go sátnejođiheaddji lei geargan sártniinis, de lei Dronnega vuorru.
- Finnmárkui boahtin lea dego vitamiinnaid oažžun, logai Dronnet Sonja iežas vuosttaš sártnis dán mátkkis. - Lea álo veaháš earenoamáš vásáhusa fitnat min davimus ja stuorámus fylkkas, gos ásset olbmot geat leat hárjánan biekkain ja dálkkiin – dat čájeha ahte dii duođai nagodehpet dan. Lea hávski muosáhit doaibmilis báikkálaš servodagaid gos lea máŋggabealát organisašuvdnaeallin.
Dronnet rámidii sihke ealáhusaid ja organisašuvnnaid doaibmadási, ja dasa lassin maid luonddu mii addá vejolašvuođaid sihke ealáhusaide ja astoáiggedoaimmaide. Ja son logai dovdat soapmásiid geat dovdet bures dan guovllu golbma luossajoga – ja Riehpavuonjohka lea okta riikka buoremus luossajogain…
Gonagasbárra beasai oaidnit čájáhusa maid oahppit ledje ráhkadan Fálesnuori historjjá birra ovddešáiggis, dál ja boahtteáiggis. Lei maid vejolašvuohta dearvvahit muhtumiid gili boarrásepmosiin – Fálesnuori buhcciidsiiddas, gos Gonagas ja Dronnet finaiga maŋŋil lágideami Ráđđeviesu luhtte.
Ii leat vuosttaš geardi go Gonagas Harald ja Dronnet Sonja leaba almmolaš guossástallanmátkkis Fálesnuoris. Soai leigga doppe Ruvdnaprinsabárran 1972:s.
- Ja lea earenoamáš somá boahtit fas fylkkamátkái Finnmárkui, logai Dronnet, danin go dáppe din fylkkas álggahuvvui dát árbevieru juo 1969:s - ahte juohke jagi fitnat fylkkamátkkis.
Viidáseappot Ávanuorrái
Ávanuorri Muosát suohkanis lea okta dain báikkiin gosa Hurtigruta bisána, muhto odne gal lei Gonagasskiipa mii luittii áŋkora dien guolástannuorrái. Gonagas ja Dronnet bođiiga kájái eske veaigin, ja de manaiga viidáseappot spábbačiekčanšilljui, gosa Muosát ássit ledje čoahkkana dearvvahit Gonagasbára.
Doppe lei lávlun ja sárdnun, muhto Gonagasbárra beasai maid gullat eanet Fruholmen birra – mii lea davimus čuovgistašuvdna fatnasiidda ja muitalusa mielde maiddái dat báiki gos leat buot garraseamos dálkkit olles Norggas. Muitaluvvui maid eará gonagaslaš guossástallama birra. Prinsa Ludvig Filip báhtarii Frankriikka revolušuvnnas ja jagis 1795 bođii son Muosáhii. Son šattai maŋŋil Frankriikka gonagas, nugohčoduvvon suoidnemánu monarkiija oktavuođas gaskal 1830 ja 1848.
Olju ja guolli
Spábbačiekčanšiljus vulge sii viidáseappot oljosuodjalanvuorkái, gos Hilmar Gerhardsen, gii lea Norsk Oljevernforening for Operatørselskap jođiheaddji, muitalii oanehaččat Gonagassii ja Dronnegii dan guovllu dehálaš oljosuodjalangearggusvuođa birra.
Gonagasbárra loahpahii guossástallama guollekájás. Dohko ledje guolásteaddjit ja guollefitnodagat láhčán veaháš das mas maid sii mearas ožžot.
- Lean gullan ahte Muosát guollefatnasat, main leat hui iešguđetlágan doaimmat,leat ožžon vel stuorát ovddasvástádusa, maŋŋá go Hallvika oljosuodjalanvuorká rahppojuvvui mannan čavčča, logai Gonagas sártnistis Ávanuoris. Dál go Goliat vuosttaš oljorogganbáiki lea huksejuvvon, mii lea stuorámus oljorogganrusttet Barentsábis, lea hui dárbu nannet ollislaš oljosuodjalangearggusvuođa Finnmárkku olggobealde. Lean ipmirdan ahte máŋga guolástanfatnasa leat das mielde, ja vihtta Muosát ássi leat ožžon oljosuodjalusas oahpu. Fertet sávvat ahte dii ehpet goassege dárbbaš váldit atnui dien oahpu!
Dál eahkes leaba Gonagas Harald ja Dronnet Sonja Arctic View málesguossin, ovdal go Gonagasskiipa vuolgá viidáseappot Gilivutnii.