Gonagasbárra Romas
Gonagasbárra jotkkii stáhtaguossástallama Italias odne. Iđđesbeaivvi sii ledje Italia našunála monumeantta luhtte, gos Majestehta Gonagas bijai lieđđekránssa Dovdameahttun soalddáha hávddi ala.
Dat áibmadas váhneneanan monumeanta «Il Vittoriano» lea Roma guovddážis, ja lea čadnon ovttastuvvon Italia vuosttaš gonagassii, Viktor Emmanuel II. Ollugat dovdet dan maiddái Váhneneanan áltárin, «Altare della Patria», mii symbolisere iešheanalaš friddja Italia. Monumeanta lea ráhkaduvvon gaskal 1885 ja 1927, ja dan hervemis oaidná Italia kultuvrra, dáidaga ja árbevieruid iešguđet guovlluin ja áigodagain.
Maiddái Dovdameahttun soalddát gudnijahttojuvvo dán monumeantta luhtte, ja odne bijai Gonagas Harald lieđđekránssa dán muitobáikái allaáiggálaš seremoniijas.
Capitol ja Forum Romanum
Lieđđekránssa bidjamis jotkkii Gonagasbárra mátkki Capitolaláža monumeantta lusa, gos soai manaiga ságastallamiidda Roma doaibmi sátnejođiheddjiin, Francesco Paolo Tronca.
Capitol báikkis beasaiga Gonagas Harald ja Dronnet Sonja váccašit Forum Romanum čađa. Gonagasbárra beasai geahččat ja gullat dien guovllu birra, mii máŋga čuohtejagi lei Romariikka čielga guovddáš.
Forum Romanum lei dakkár báiki gos jođihuvvui politihkka ja gávppašeapmi, oskkolaš seremoniijat, vuoitoávvudeamit ja diggeáššit. Das lei sihke senáhta ja ollu dehálaš tempelat ja muitomearkkat. Dál leat diein stuora monumeanttain báhcán dušše bázahusat.
Forum Romanum geasuha birrasii 4,5 miljovnna gussiid jahkásaččat. Doppe leat čađat arkeologalaš roggamat ja rekonstrukšuvnnat, čájehan dihtii movt dat báiki lei olggosoaidnit ovdalaš áiggiid.
Dronnet čujuhii dasa man árvvus Italia olbmot atnet historjjá.
- Sii áimmahuššet viessobázahusaid ja visttiid, dakkár diŋggaid mat muitalit juoidá vássán áiggiid birra. Das sáhttit mii maid oahppat juoidá.
Vuostáiváldin
Maŋŋel gaskabeaivvi leigga Majestehtaguovttos Gonagas ja Dronnet, Eksellense Presideanta Sergio Mattarella ja Italia vuosttašroavvá, Laura Mattarella, guossin almmolaš vuostáiváldindilálašvuođas, man guossoheaddjin lei norgga ambassadevra Romas, Bjørn Trygve Grydeland. Dohko ledje čoahkkanan birrasii 200 guossi geat ovddastedje Norgga ja Italia ealáhusaid ja servodateallima, ja sii besse návddašit earet eará Sølvguttene joavkku čáppa lávluma.
Jotket Milanoi
Maŋŋá almmolaš earránaddanseremoniija Palazzo del Quirinale gárdimis, vuolgá Gonagasbárra veaigin mátkkoštit viidáseappot Milanoi, gos soai galgaba leat stáhtaguossástallama maŋemus beaivvi. Doppe galget ságastallat ealáhusgažaldagaid, mas eandalii deattuhit energiija ja bivttasvieruid. Norgga designa ja giehtaduodji leat maid guovddážis ihttá prográmmas.