Gonagasbára gieddefeasta
Odne lágideigga Majestehtaguovttos Gonagas ja Dronnet gieddefeastta Šloahttapárkkas. 1500 guossi miehtá riikka ledje bovdejuvvon dohko.
Dán geasi bovdii gonagasbárra gieddefeasttaide dain gávpogiin gos soai leigga guossin iežaska ávvudanmátkkis riddoguovlluin. Odne bovdiiga Gonagas Harald ja Dronnet Sonja festii "iežaska giettis": Šloahttapárkkas. Guossit ledje boahtán buot fylkkain ja Svalbárddas. Almmolaš Norga lei doppe, stáhtaministtar Erna Solberg njunnošis - ja ledje maiddái ollu earát geat ovddastedje organisašuvnnaid maid suodjaleaddjit gonagaslaš bearraša lahtut leat. Guossit boahtigohte diibmu 13.00 rájes, ja ledje ollu kulturovdanbuktimat musihkain ja dánssaiguin mat guoimmuhedje gussiid gitta diibmu 14.00 rádjái, go Gonagasbearaš bođii. Sihke Ruvdnaprinsabárra, Prinseassa Ingrid Alexandra ja Prinsa Sverre Magnus, ja Prinseassa Astrid, Ferner roavvá, ledje fárus.
- Norga leat ovddemustá olbmot
Gonagas Harald sávai gussiide buresboahtima.
- Dii geat lehpet dása dál čoahkkana, ovddastehpet dan viidodaga mii otná Norga lea. Na mii lea dasto Norga?, jearai Gonagas, ja čujuhii ollu mihtilmasvuođaide min riikkas.- Muhto Norga lea ovddemustá olbmot. (...)
Mu stuorámus sávaldat Norgga ovddas lea ahte mii nagodivččiimet váldit vára guhtet guoimmisteamet.
Ahte mii hukset dán riikka viidáseappot – luohttevašvuođain, oktavuođain ja árvvasvuođain.
Ahte mii dovdat dan ahte mii – man iešguđetlágánat dal de ain leažžat – leat okta álbmot.
Ahte Norga lea okta.
Gonagasa sárdni gávdno go čuovvu čujuheaddji dás olgešbealde.
Kulturovdanbuktimat ja borramušat
Maŋŋel Gonagasa sártni bođii Kari Bremnes lávdái. Su maŋŋil doalai okta otná gussiin, Ali Al-Jabri, sártni, ja dan maŋŋil besse guossit boradit biebmolávuin. Doppe guossohedje smávva biepmuid, namalassii lagabui 24 000 kanapea.
Dasto lei stáhtaministara Erna Solberg sáhkavuorru, ja su maŋŋil eanet guoimmuheamit, Ivdnespeallu ja Gonagasa garde, ja Mari Holven dánssui steve dánssu gussiide.
Vuolgaleapmi
Dronnet Sonja loahpahii feastta mana dearvan sártniin, gos son giittii gussiid – geain ollugat ledje mátkkoštan hui guhkes mátkki – ja buohkaid sin geat ledje illudahttán gussiid iešguđetlágan ovdanbuktimiiguin.
- Giitu go lehpet min riikkaolbmot! Min mielas lea Norgga álbmot hui ovddolaš. Juohke báikkis gos moai mátkkoštetne – ja gos letne mátkkoštan fargga 50 jagi juo Ruvdnaprinsabárran ja Gonagasbárran – doppe letne vásihan liekkuslaš ja ustitlaš vuostáiváldima. Mun dovddan ahte mii guoddit guhtet guoimmisteamet gaskasaš nanu ja buori oktavuođas. Dan ovddas hálidan din earenoamážit giitit dál odne.
(...)
- Mis lea nu ollu man dihtii berret leat giitevaččat. Mii ássat ain ráfálaš eanaguovllus máilmmis. Suodjalehkot dan mii midjiide lea buot deháleamos: Nu ahte ain sáhttit ságastallat rahpasit, ja ain beassat dovdat oadjebasvuođa, ja ain beassat váldit oahpu – ja ain beassat eallit friddjavuođas.
Oslo Soul Children & Oslo Soul Teens lávlo gussiide mannet dearvan.